Qazaqstan astanasynda Reseidıŋ äskeri-tarihi qoǧamynyŋ (RÄTQ) ökıldıgı aşyldy, dep habarlaidy "Adyrna" ūlttyq portaly TASS agenttıgıne sılteme jasap.
Būl turaly "Euraziialyq monitoring" saraptamalyq zertteuler ortalyǧynyŋ direktory, RÄTQ-nyŋ Qazaqstandaǧy ökılı bolyp taǧaiyndalǧan Älıbek Täjıbaev mälımdedı.
«Astanada RÄTQ ökıldıgı aşyldy, qazırdıŋ özınde 2025 jylǧa arnalǧan ıs-şaralar josparyn jasauǧa belsendı kırıstık. Josparda konferensiialar men aǧartuşylyq baǧdarlamalar bar», – degen Täjıbaev.
Onyŋ aituynşa, aldaǧy ıs-şaralar baǧdarlamasyn äzırleu üşın qazaqstandyq tarihşylarmen jäne qoǧam qairatkerlerımen kelıssözder jürgızılıp jatqan körınedı. Sonymen qatar joǧary oqu oryndarymen, muzeilermen jäne ardagerler ūiymdarymen yntymaqtastyq ornatu josparlanuda. Onyŋ pıkırınşe, ökıldıktıŋ aşyluy ekı el arasyndaǧy gumanitarlyq bailanysty nyǧaituǧa septıgın tigızedı.
Aita keteiık, RÄTQ 2023 jyly Qazaqstannyŋ eŋ ırı qalasy – Almatyda Aleksandr Nevskii esımımen atalǧan şırkeudıŋ aldyna osy kniazdıŋ eskertkışın ornatqan. Atalǧan eskertkıştıŋ aşyluyna sol kezdegı qala äkımı Erbolat Dosaev qatysqan. Onyŋ būl äreketı qoǧamda türlı pıkır tudyrdy. Köpşılık būl qadamdy Resei yqpalynyŋ simvolikalyq körınısı retınde baǧalap, äleumettık jelılerde narazylyq bıldırdı.
Resei äskeri-tarihi qoǧamy 2012 jyly Resei prezidentı Vladimir Putinnıŋ jarlyǧymen qaita qūrylǧan. Qoǧamnyŋ töraǧasy – Resei prezidentınıŋ kömekşısı Vladimir Medinskii. Ol 2023 jyly Nevskiidıŋ Almatydaǧy eskertkışınıŋ aşyluyna qatysqan. Medinskii taiauda Türkiiada bolǧan Ukrainamen kelıssözge Resei delegasiiasyn bastap aparǧan.
Bır kezde Resei syrtqyısterminı Sergei Lavrovtyŋ ortaq tarih turaly aitqany Qazaqstan qoǧamynda qatty synalǧan.
