Түркістан облысы, Ордабасы ауданындағы Шоқан Уәлиханов атындағы мектеп-гимназияның түлегі Жәнібек Әбілхан биылғы негізгі Ұлттық бірыңғай тестілеуде ең жоғарғы – 140 балл жинаған алғашқы түлек атанды.
Ұстаздары Жәнібек Әбілханның үздік шәкірт екенін айтып, пікір білдірді.
«Жәнібек 1 сыныптан бастап Шоқан Уәлиханов атындағы мектеп-гимназияда білім алып келеді. Мектеп-гимназия директоры – Сәуле Исанова. Сынып жетекшісі – Гүлзира Бортай. Оқушымыз ұлттық бірыңғай тестілеуде (ҰБТ) информатика пәнін таңдаған. Көпбалалы отбасынан шыққан Жәнібек – ізденімпаз, білімді оқушы. Жәнібектің жетістігі – табандылық пен жүйелі дайындықтың нәтижесі», – деп пікір білдірді ұстаздары.
Жәнібек Әбілхан - үйінің екінші баласы. Ол ҰБТ тестін аяқтамай тұрып, өзіне сенімді болғанын айтты.
«Аяқтауды баспай тұрып, 140/140 алатынымды білдім» - дейді ол.
Үздік нәтиже көрсеткен Жәнібекпен сұхбаттасып, оның жетістікке жету жолын сұрап білдік.
- Ең әуелі, 140 баллмен құттықтаймыз! Максималды балл жинау үшін қалай дайындалдыңыз? Қай уақыттан бастап жүйелі түрде ҰБТ-ға дайындықты бастау керек?
- 10 сынып кезінде бейінді пәндерін таңдап, ҰБТ-ға дайындығымды бастадым. Сол кезде дайындық курстарына да жазылған едім.
- Сіз үшін мектепте
- Маған гуманитар пәндер қиынға соғады. Соның ішінде Қазақстан тарихы. Тарихтан ең алғашында нәтижем төмен еді. Кітап оқып, тақырыптарды түсініп қиын пәнді оңай меңгердім.
- Емтихан кезінде өз-өзіңді қалай ұстап, қобалжуды қалай жеңдіңіз?
- Өз мұғалімдерімнің сенімі арқасында қобалжуды жеңдім десем болады
- ҰБТ-ға дайындалып жүрген оқушыларға қандай кеңес берер едіңіз?
Дайындықты ерте бастау керек. Әр істі бастамас бұрын алдыға мақсат қою қажет дейтін едім.
- 140 балл алдыңыз. Енді қай жоғары оқу орнына түсу жоспарда бар?
Таңдау пәнім - информатика-математика. Қай ЖОО түсетінімді әлі нақты таңдамадым. Бірақ Алматы немесе Астана қаласының ЖОО түсу ойымда бар.
- Наурыз айындағы ҰБТ-дан қанша жинап едіңіз?
- Наурызда болған ҰБТ-дан мен 133 балл жинаған едім. Енді нағыз ҰБТ 140 балл жинадым.
- Алдағы оқу жылына сәттілік!
Айта кетейік, 2025 жылғы Қазақстандағы негізгі Ұлттық бірыңғай тестілеу 16 мамырда басталып, 7 шілдеге дейін жалғасады.
Сымбат Наухан
«Адырна» ұлттық порталы
