Өзбекстан президенті Шавкат Мирзиёев білім беру жүйесін реформалауға арналған кеңесте елде қытай тілін тереңдетіп оқыту бағдарламасы жүзеге асырылатынын айтты, деп хабарлайды "Адырна" ұлттық порталы Ферғанаға сілтеп.
Бұл үшін республикаға Қытайдан 100 тіл маманы мен ерікті шақырылады.
Мирзиёевтің айтуынша, Қытайға жасаған сапары барысында энергетика, геология, химия, транспорт, ауыл және су шаруашылығы салалары бойынша қытайлық ірі компаниялармен келісімдерге қол жеткізілген. Нәтижесінде $35 млрд көлемінде инвестициялық жобалар пакеті әзірленді. Бұл бастамаларды іске асыру үшін заманауи технологияларды меңгерген әрі қытай тілін білетін мыңдаған маман қажет. Осыған байланысты әр өңірде екі «Өзбек-қытай шеберханасы» ашылады.
Президент білім саласындағы жетістіктерді де атап өтті. 2025 жылдың басынан бері өзбек оқушылары халықаралық олимпиадаларда 195 медаль жеңіп алған. Келесі жылы республикада химия және информатика пәндерінен халықаралық жарыстар өтеді. Бұған қоса, шет тілдерін үйрететін мыңнан астам мектепте сертификат алған балалардың саны бір жыл ішінде 2,5 есе артқан.
Сондай-ақ, Өзбекстан оқушылары бірінші сыныптан бастап информатика оқып, жоғарғы сыныптарда жасанды интеллект бойынша сабақтар енгізілмек. Осы мақсатта 2 мың сынып заманауи компьютерлер мен интерактивті тақталармен жабдықталады.
