Кинематография саласындағы ең беделді марапаттардың бірі – «Оскар» сыйлығы жаңа ережелер енгізіп, киноиндустриядағы талаптарды күшейтті. Кинематографиялық өнер және ғылым академиясы қабылдаған өзгерістер технологиялардың дамуына және Голливудтағы шығармашылық мамандардың талаптарына байланысты жүзеге асты.
Жаңартылған талаптарға сәйкес, нейрожелі немесе жасанды интеллект көмегімен жасалған жобалар енді марапатқа үміткер бола алмайды. Академия кез келген фильмнің «адам қолымен жасалғанын» дәлелдеуді міндеттейді. Бұл талап сценарийден бастап, актерлік ойын мен визуалды шешімдерге дейінгі барлық кезеңді қамтиды.
Сонымен қатар, ұйымдастырушылар қажет болған жағдайда фильмнің өндірісіне қатысты толық техникалық құжаттарды сұратуға құқылы. Бұл қадам киноөндірістегі ашықтықты арттыруға бағытталған.
Жаңа ережелер актерлік және сценарийлік жұмыстарға да әсер етті.
Енді:
- актерлік номинациялар тек тірі актерлерге ғана беріледі;
- жасанды интеллект арқылы жазылған сценарийлер конкурсқа қабылданбайды;
- қайтыс болған актерлердің цифрлық бейнесін қолдануға шектеу қойылады.
Бұл өзгерістер адам еңбегін қорғауға және шығармашылық мамандықтардың құндылығын сақтауға бағытталған.
Маңызды жаңалықтардың бірі – актерлерге қатысты шектеудің алынып тасталуы. Бұрын бір актер тек бір рөлі үшін ғана ұсынылса, енді бірнеше фильмдегі рөлдерімен қатар үміткер бола алады. Бұл шешім әртістердің еңбегін жан-жақты бағалауға мүмкіндік береді.
Академия халықаралық фильмдерге қатысты саясатты да қайта қарады. Бұрын әр ел тек бір фильм ұсынса, енді бұл шектеу жойылды. Фестивальдерде жоғары марапат алған фильмдер «Оскарға» тікелей қатыса алады.
Сонымен қатар, «Үздік халықаралық фильм» номинациясында жүлде енді елге емес, режиссерге табысталады.
Жаңа ережелер киноиндустриядағы ашықтықты арттырып, адам еңбегінің маңызын қайта алға шығаруды көздейді. Сарапшылардың пікірінше, бұл өзгерістер «Оскар» сыйлығының беделін сақтап қана қоймай, оны жаңа дәуірге бейімдейді.
