Францияда мектеп оқушыларының наразылық акциялары кеңейіп, кей өңірлерде қайтадан полициямен қақтығысқа ұласты. Бұл туралы 30 қыркүйек күні кешке AFP агенттігі жазды, деп хабарлайды «Адырна» тілшісі.
Елдің ішкі істер министрі Лоран Нуньестің мәліметінше, наразылық шаралары 356 мектепті қамтыған. Бір күн бұрын мұндай мектептердің саны 338 болған. Тәртіпсіздіктер басталғалы бері 625 адам ұсталып, 83 полиция қызметкері мен жандарм жарақат алған.
Париждегі білім министрлігі өткен аптадан бері жалғасып жатқан наразылықтар салдарынан 119 оқушы мен 34 мектеп қызметкерінің зардап шеккенін мәлімдеді. Ведомство басшысы Эдуар Жеффре бұл жағдайды «білім беру саласындағы бұрын-соңды болмаған оқиға» деп атады. Францияда жалпы саны шамамен 3700 мектеп жұмыс істейді.
Наразылықтар алғашында Париж аймағындағы Иль-де-Франс өңірінде басталып, кейін бүкіл елге тарады. Жоғары сынып оқушылары сыныптардың шамадан тыс толып кетуіне, мұғалімдердің жетіспеуіне, білім беру мекемелерінің нашар жағдайына және оқу кестесінің тым ауыр екеніне наразылық білдіруде.
Кейбір ірі қалаларда акциялар полициямен қақтығысқа ұласқан. Жекелеген жағдайларда наразылық білдірушілер жанғыш қоспа құйылған бөтелкелер мен тастар пайдаланған. Бұған жауап ретінде полиция көзден жас ағызатын газ қолданды.
Франция президенті Эмманюэль Макрон көптеген жастың «алаңдаушылығы мен ашу-ызасын» түсінетінін айтты. Алайда ол бұл мәселелердің ешқайсысы зорлық-зомбылықты ақтай алмайтынын атап өтті.
Франция үкіметі оқушылар өздерінің «алаңдаушылықтары мен талаптарын» білдіре алатын арнайы кеңес беру платформасын құратынын жариялады. Бұл платформа 6 қазаннан кешіктірілмей іске қосылуы тиіс. Одан кейін билік елдегі жағдайға жан-жақты талдау жүргізуді жоспарлап отыр.
«Біз қандай жағдай болса да оқушылардың оқу үдерісіне қайта оралуын қамтамасыз етуіміз керек», – деді өз кезегінде Білім министрлігінің басшысы.
AFP мәліметінше, солшыл-популистік «Бағынбайтын Франция» (La France Insoumise) партиясы оқушылардың наразылық қозғалысын қолдап отыр. Партия жетекшісі Жан-Люк Меланшон өз саяси күшінің тек бейбіт наразылық түрлерін қолдайтынын мәлімдеді.
