Қазақстан коронавирус инфекциясынан болған пандемияның болжамды екінші толқынымен күресу үшін қосымша 238,7 млрд теңге жұмсайды. Бұ туралы бүгін Парламент Сенатының жалпы отырысында «»2020-2022 жылдарға арналған республикалық бюджетті нақтылау туралы Заң жобасын» таныстырған Қаржы министрі Ерұлан Жамаубаев мәлім етті, деп хабарлайды «Адырна» ұлттық порталы.
Айта кетейік, заң жобасын 21-қазан күні Мәжіліс мақұлдаған болатын.
Ерұлан Жамаубаевтың айтуынша, бюджетке нақтылау енгізудің басты міндеті дәрігерлерге материалдық қолдау көрсету және COVID-19-дың таралу мүмкіндігінің екінші толқынына қарсы белсенді шаралар қабылдау.
«Осы мәселелерді шешу үшін 238,7 млрд. теңге сомасында қосымша қаржы көзделді.Шығыстар мынадай бағыттарға жұмсалады.
Атап айтсақ, карантин іс-шараларын жүргізуге тартылған медицина қызметкерлеріне жалпы сомасы 143,4 млрд. теңгеге қосымша ақы төлеу. Екінші, тегін медициналық көмектің кепілдендірілген көлемі шеңберінде COVID – 19-дың таралуына жол бермеу мақсатында медициналық қызметтерге ақы төлеуге 83 млрд теңге жұмсау. Үшіншіден, ішкі істер органдарының қызметкерлеріне эпидемияға қарсы іс-шараларға қатысқаны үшін сыйлықақылар төлеуге 11,7 млрд теңге бөлінеді», -деп хабарлады Жамаубаев.
Бұдан өзге, экономиканың нақты секторын дамытуға және күш құрылымдарын әлеуметтік қолдауға 261,7 млрд.теңге сомасында шығыстар көзделген.
«Адырна» ұлттық порталы
