Қазіргі қоғамның ең үлкен байлығы – білімді де шығармашыл жас ұрпақ. Өйткені елдің болашағы балалардың арманы мен қиялына тікелей байланысты. Сондықтан олардың шығармашылық қабілетін ашу мен сапалы балалар контентін қалыптастыру – әр ата-ана мен ұстаздың, тіпті бүкіл қоғамның ортақ міндеті.
Бүгінгі балалар бұрынғы буыннан өзгеше. Олар технологияны еркін меңгерген, ақпаратты тез қабылдайды және өзін түрлі формада білдіруге дайын. Бірақ осы мүмкіндіктің бәрі дұрыс бағытталмаса, баланың қиялы мен қызығушылығы желідегі бос ақпараттың арасында жоғалып кетуі мүмкін. Сондықтан ең алдымен жасөспірімдердің шығармашылығын дамытатын орта мен жағдай қалыптастыру маңызды.
Мысалы, кейбір мектептерде «Шығармашылық апталығы» сынды түрлі іс-шаралар ұйымдастырылады. Осындай шараларда балалар өз қолымен сурет салып, бейнеролик түсіріп, шағын көрініс қояды. Бұл – олардың ойлау қабілетін, жауапкершілігін және өзіне деген сенімін арттыратын тамаша мүмкіндік. Менің ойымша, әр мектепте осындай шығармашылық алаңдар тұрақты түрде өткізілсе, балалардың әлеуеті одан әрі ашылар еді.
Қазір интернет кеңістігінде түрлі балалар арналары бар. Дегенмен, олардың бәрі баланың рухани дамуына әсер ете бермейді. Сол себепті қазақ тіліндегі сапалы, тәрбиелік мәні бар контенттің көбеюі – уақыт талабы. Мәселен, “Балапан” арнасының мультфильмдері мен “Ozge Epic” секілді жобалар ұлттық құндылықтарды заманауи форматта ұсынады. Мұндай контент баланың тілін, ойлауын және мәдени санасын қалыптастыруға көмектеседі.
Балалар шығармашылығын қолдаудың тағы бір жолы – ата-ананың назарында. Егер бала сурет салуға немесе видео түсіруге қызықса, оны тоқтатпай, керісінше, шабыттандыру қажет. Бір қарағанда ұсақ көрінетін хобби болашақта үлкен жетістікке бастар жол болуы мүмкін. Көптеген танымал суретшілер мен әншілер өз жолын дәл осындай кішкентай қызығушылықтан бастаған.
Қорыта айтқанда, шығармашылық пен сапалы контент – жас ұрпақтың жан дүниесін байытып, ой-өрісін кеңейтетін ең күшті құрал. Әр бала – болашақ өнертапқыш, жазушы, суретші немесе режиссер болуы мүмкін. Тек оған сенім мен мүмкіндік беру керек. Егер біз балаларға дұрыс бағыт пен қолдау көрсетсек, олар өз шығармашылығымен елін сүйетін, мәдениетті де рухы мықты тұлға болып өседі.
