Ұлт руханиятының тағы бір жарық жұлдызы Күләш Ахметова қайтыс болды. Мәдениет және ақпарат министрі Аида Балаева ақынның отбасы мен туған-туыстарына, барша қазаққа қайғыра көңіл айтты, деп хабарлайды "Адырна" ұлттық порталы.
Бұл туралы министр желідегі парақшасында жазды.
Министр атап өткендей, Күләш Ділдәқызы ұлттық поэзияға өзгеше леп әкелген қаламгер еді. Оның өлеңдері шуақты, қаламы қуатты, әдебиетіміздің шоқтығы биік шығармалары болып, оқырман жүрегіне жетіп, терең сезімге жетелейтін туындылар қалдырды.
"Ақынның отбасы мен туған-туыстарына, барша ағайынға қайғыра көңіл айтамын!
Күләш Ділдәқызы ұлттық поэзияға өзгеше леп әкелген қаламы қуатты, өлеңі шуақты, әдебиетіміздің шоқтығы биік қаламгері еді.
Абыз Әбіш Кекілбайұлы айтқандай, «жыры күннің нұрындай, гүлдің әріндей, сүттің өңіндей, бөбектің иісіндей» ақын болатын.
Оның қаламынан туған ел мен жерге деген сүйіспеншілікке толы туындылар оқырман жүрегіне жетіп, терең сезімге жетеледі. Ақын өлеңдерінен биік болмысы, өр рухы, адам жанын дәл танып, ішкі әлемін көркем де қуатты тілмен ашатын ерекше шеберлігі айқын аңғарылады.
Қаламгер ғибратты ғұмырында мөлдір жырымен, көркем жүзімен қазақ поэзиясының ақ гүлі атанып, халқының ыстық ықыласына бөленді.
Ол нәзік те сыршыл, өміршең өлеңдерінде барша қазақ қыздарының жан сезімін, жүрек үнін көркем кестеледі.
Күләш апамыздың жарқын бейнесі мен өнегелі өмір жолы жұртшылықтың жадында мәңгі сақталады деп сенемін.
Алла тағала апамыздың жатқан жерін жарық, топырағын торқа етсін!
Бақұл болыңыз, апа", - деп жазылған көңіл айту жазбасында.
Ақынның әр жылдары «Ақ гүлім менің», «Сен менің бақытымсың», «Бұлақтағы жұлдыздар», «Мейірім», «Жапырақ – жаздың жүрегі»,"Құт", "Бақ" атты өлеңдер жинағы жарық көріп, оқырман тарапынан лайықты бағасын алды. Оның шығармалары әлемнің көптеген тілдеріне аударылған.
