Бүгін қазақтың ұлы ақыны Жамбыл Жабаевтың туғанына 180 жыл толды, деп хабарлайды "Адырна" ұлттық порталы.
Жамбыл Жабаев 1846 жылдың 28 ақпанында Жамбыл облысы, Жамбыл тауының етегінде дүниеге келген. Ол – қазақ халық поэзиясының көрнекті өкілі, жырау, жыршы, ақындық шеберлігімен танылған тұлға.
Жамбыл Жабаевтың ақындық дарыны жас кезінен байқалып, ол бозбала кезінде Жетісу өңірінде сөз өнерін дамытқан Сүйінбай Аронұлына жолығып, ақындық тәлім алған. Сонымен бірге Жамбыл қырғыз ақын-жырауларымен де айтысып, олардың поэзиясынан тағылым алған. Ол эпикалық дәстүрді, халық жырауларының сөз өнерін жаңа мазмұнмен толықтырған.
Жамбыл Жабаев өмір сүрген кезең – Қазақстан үшін ауыр әлеуметтік саяси дәуір еді. Ақын патша үкіметі мен Қоқан хандығының қыспағына, кейінгі кеңестік кезеңнің өзгерістеріне куә болып, халық тағдырын, әлеуметтік теңсіздікті өлең-жырында шыншылдықпен жеткізген. Оның шығармалары «Шағым», «Жылқышы», «Өстепкеде», «Туған елім» сияқты елдің өміріне арналған тақырыптарды қамтиды.
Жамбыл шығармашылығы эпикалық, айтыс, толғау және лирикалық туындылардан тұрады. Оның жырлары халық өміріндегі жеңістер мен ерліктерді, қоғамдық жаңғыруларды бейнелеп, азаматтық поэзияны қалыптастырды. Ақынның шығармалары 13 мыңнан астам тармақтан тұрады, көптеген шығармалары шет тілдерге аударылып, әлемге танылды.
Жамбыл Жабаев Ленин ордені, Еңбек Қызыл Ту ордендері сияқты мемлекеттік марапаттармен марапатталған. Ақынның есімі Қазақстандағы облыс, аудандар, мектептер мен мәдениет орындарына берілді.
