Өзбекстанның халық әртісі Юлдуз Усманова Нью-Йорктегі «Океан» театрында 9 мамырға жоспарланған концерті төңірегіндегі жанжалға қатысты пікір білдірді, деп хабарлайды «Адырна» тілшісі Podrobno.uz-ға сілтеме жасап.
Қазіргі таңда Брайтон-Бичте Усманованың концертін тоқтатуды талап етіп жатыр. Бұған дейін америкалық саясаткерлер Майкл Новахов пен Брюс Блейкман әншіні антисемитизмге айыптап, оның өшпенділікке толы риторика қолданғанын алға тартқан еді. Сол себепті олар АҚШ Мемлекеттік департаментінен өнер иесінің визасын жоюды талап еткен.
«Егер сендер, сионистер, мен кешірім сұрайды деп ойласаңдар, қатты қателесесіңдер», — деді Усманова.
Әншінің пікірінше, наразылықтардың күшеюі жергілікті саяси үдерістер мен сайлауларға байланысты, ал бұл тек «оның танымалдығына жұмыс істеп жатыр».
«Маған сендердің істейтін жұмыстарың болмай, маған қарсы шығып отырғандарың қуаныш сыйлайды. Демек, мен сендерді жақсылап қозғай алады екенмін», — деп қосты ол.
Өз сөзінде әртіс палестина-израиль қақтығысына қатысты көзқарасын тағы да білдіріп, Палестина аумағын оның байырғы жері деп санайтынын атап өтті.
«Мүмкін, сендер ежелгі халық шығарсыңдар, бірақ сендер — жаңа мемлекетсіңдер, Израиль. Америка — Израиль емес. Сондықтан өздеріңді қожайынбыз деп ойламаңдар», — деді ол.
Саясаткерлердің талаптары мен театр ғимараты маңында жоспарланған наразылық акцияларына қарамастан, Усманова концертке билеттердің түгел сатылып кеткенін хабарлады. Ол көрермендермен кездесулер алдағы уақытта да жалғасатынына сенім білдірді.
«Алла маған талант бергенше, мен ән айта беремін. Адамзат үшін ән айтамын. Ал әділдік түбінде орнайды», — деп түйіндеді әнші.
