Франция билігі 24 қазанға жоспарланған жаппай наразылық акциялары кезінде полицияға көмектесу үшін әскери қызметкерлерді жұмылдырады. Олар нысандарды күзетіп, құқық қорғау органдарының көшелердегі қауіпсіздікті қамтамасыз етуіне мүмкіндік береді. Бұл туралы елдің ішкі істер министрі Лоран Нуньес Ұлттық ассамблеяда мәлімдеді, деп хабарлайды «Адырна» тілшісі.
«Біз, әрине, ішкі қауіпсіздік күштерінің орнына, ең алдымен, нысандарды тұрақты күзету міндеттерін орындау үшін Sentinelle операциясына қатысатын әскери қызметкерлерді жұмылдырамыз», – деді министр.
Нуньестің айтуынша, бұл шешім демонстрациялар кезінде қоғамдық тәртіпті сақтау үшін көбірек полиция қызметкері мен жандармды тартуға мүмкіндік береді. Sentinelle операциясы 2015 жылғы қаңтарда Парижде болған бірқатар терактіден кейін іске қосылған. Операция аясында әскери қызметкерлер қоғамдық орындар мен маңызды нысандарды күзетіп, көшелерді патрульдейді.
19 қазанда Франция президенті Эммануэль Макрон жаппай тәртіпсіздіктерден кейін Лоран Нуньестің отставкасын қабылдаудан бас тартқан еді. BFMTV телеарнасының Елисей сарайына сілтеме жасап хабарлауынша, мемлекет басшысы министрге жаппай бүлдіру әрекеттері мен тонаушылықтың алдын алуға бағытталған қосымша шаралар әзірлеуді тапсырған.
Сол күні премьер-министр Себастьян Лекорню елдің жекелеген қалаларында ішінара коменданттық сағат енгізу туралы шешім қабылдады. Шектеулер бұған дейін тәртіпсіздіктер болған орталық аудандарды қамтыды.
18 қазанда Лоран Нуньес өмір сүру құнының өсуіне қарсы наразылық акцияларына қатысқан 2000-нан астам адамның ұсталғанын хабарлады. Оның мәліметінше, 600-ден астам полиция қызметкері, жандарм мен өрт сөндіруші жарақат алған. Сондай-ақ бірнеше жүздеген компания шығынға ұшыраған.
