Elordadaǵy fızıka-matematıka baǵytyndaǵy Zııatkerlik mektepte bıylǵy oqý jyly aıtýly jáne kópten kútken oqıǵa – dombyra sabaǵymen aıaqtaldy, ony Gınness rekordtar kitabyna «Eń aýqymdy dombyra sabaǵy» ataýymen onlaın tirkeý josparlanyp otyr. Qazaq halqynyń basty mýzykalyq aspabynda bir mezgilde myń oqýshy oınady.
Eń aýqymdy dombyra sabaǵyna qosymsha bilim berý pedagogy, Qazaqstan Respýblıkasynyń eńbek sińirgen mádenıet qaıratkeri Aıtjan Toqtaǵan dırıjerlik etti. Myńdaǵan oqýshynyń oryndaýynda «Saryarqa», «Balbyraýyn», «Erkem-aı», «Keńes», «Jastar bıi» syndy ataqty kúıler kúmbirlep, týyndylardyń shyǵý tarıhy baıandaldy.
Elordadaǵy fızıka-matematıka baǵytyndaǵy Zııatkerlik mektep oqýshylary búkil álemge bizdiń elimiz ben mádenıetimizdi, halyqtyń jany dep ataýǵa bolatyn basty mýzykalyq aspapty tanystyrdy. Naǵyz qazaq – dombyra ekenin bárimiz jaqsy bilemiz, sondyqtan búgingi kúndi tarıhı dep ataýǵa bolady, – dep moıyndady «Nazarbaev Zııatkerlik mektepteri» DBBU Basqarma tóraıymy Kúlásh Shámshıdınova.
El astanasyndaǵy fızıka-matematıka baǵytyndaǵy NIS-te dombyra boıynsha elektıvti kýrstar 2016 jyly engizildi. Aıtjan Toqtaǵanovtyń jetekshiligimen qurylǵan mektepishilik «Jiger» ansambli kóptegen respýblıkalyq jáne halyqaralyq mýzykalyq baıqaýlardyń jeńimpazy, «Sun of Italy» ıtalıandyq festıval-baıqaýynyń bas júlde ıegeri, AQSh-tyń ataqty Garvard pen Boston ýnıversıtetteri jáne Massachýsets tehnologııalyq ınstıtýty sahnalarynda óner kórsetti.
Dombyra – árbir qazaq úshin qasıetti aspap, al bizdiń sabaǵymyzdy Gınness rekordtar kitabyna engizý – bul dombyrany búkil álemge pash etý, – dep atap ótti Aıtjan Toqtaǵan.
Guinness World Records-qa (GWR) ótinim 2021 jyldyń jeltoqsan aıynda berildi. Gınness rekordtar kitabynyń talaptary boıynsha aýqymdy sabaqty 25-ten astam stıýard pen 2 kýáger qadaǵalady. Árbir 50 qatysýshyny bir táýelsiz stıýard baqylap, beınejazba aımaǵynan shyqqan nemese qajetti áreketti oryndamaǵan toptaǵy kez-kelgen qatysýshyny dıskvalıfıkaııalaý jumysyna jaýapty boldy. Kýágerler GWR-diń senimdi ókili retinde qyzmet atqaryp, rekordtyń ornaýy men Kitaptyń barlyq krıterııleriniń tolyq saqtalýyn qamtamasyz etti.
Guinness World Records erejelerine sáıkes aýqymdy sabaq bastalar aldynda barlyq qatysýshy eki tirkeý pýnktinen ótti: birinshisi – jeke beıdjderin skanerlep, «Kandıdat-marker» baǵdarlamasy arqyly aımaqqa kirdi, ekinshisi – kezekshi qatysýshylardyń mehanıkalyq esebin júrgizdi.
Men Zııatkerlik mektepke túskennen keıin dombyra tartýdy úırendim. Al qashyqtan bilim alyp júrgen kezde beınesabaqtar arqyly meńgere bastadym. Búgin biz úshin erekshe kún. Árıne, qobaljý boldy, alaıda Gınness kitabyna kúı oryndaǵanymyzǵa qýanyshtymyz jáne bul rekordty dombyraǵa arnaımyz, – dep 9-synyp oqýshysy Erasyl Aıbekuly óz áserimen bólisti.
Bir mekteptiń myńǵa jýyq oqýshysy ulttyq mýzykalyq aspapty jetik meńgerip, birge kúı oryndaýy álemdegi tuńǵysh oqıǵa. Qazaqstandyq rekord asa kórnekti jetistikter men biregeı qubylystar týraly jahandyq anyqtamalyqqa engiziledi dep josparlanýda.
Qazaq halqynyń basty ulttyq aspaby – dombyra Nazarbaev Zııatkerlik mektepteriniń sımvolyna aınaldy. Búgingi tańda elimizdegi barlyq NIS-te dombyra pániniń elektıvti kýrstary engizilip, onyń aıasynda Qurmanǵazy Saǵyrbaıuly, Táttimbet Qazanǵapuly, Nurǵısa Tilendıevtiń ataqty kúıleriniń tarıhy mindetti túrde oqytylady, al eń tanymal jobalardyń qatarynda «100 kúıdiń tarıhy» jobasy bar, barlyq mektepte dombyra ansamblderi men stýdııalary jumys isteıdi, dombyra sabaqtary matematıka, fızıka, shet tili sabaqtarymen ushtastyrylýda, jas mýzykanttar «Uly dala muragerleri» dástúrli fleshmobynda jyl saıyn el sahnalaryn baǵyndyryp júr. Dombyra men ulttyq mýzykaǵa degen qyzyǵýshylyqty arttyrý boıynsha júıeli jumys NIS-tiń halyqtyq qundylyqtar men dástúrlerdi saqtaý boıynsha aýqymdy baǵdarlamasy aıasynda iske asyrylyp keledi.
Búgin barlyq Zııatkerlik mektepterdegi oqý jyly dombyra sabaǵymen aıaqtaldy.
