Qyzylorda oblysy ákiminiń orynbasary Baljan Shamenova Óńirlik kommýnıkaııalar qyzmetiniń aqparat alańynda BAQ ókilderimen baspasóz konferenııasyn ótkizdi, dep habarlaıdy «Adyrna» tilshisi.
«2021 jyldyń naýryz aıynan bastap oblys ákiminiń orynbasary qyzmetine taǵaıyndalyp, aımaqtyń áleýmettik-ekonomıkalyq damýyna qyzmet ettim. Áleýmettik salaǵa jaýapty bolǵandyqtan eń áýeli densaýlyq saqtaý salasynda pandemııamen betpe-bet keldik. Meniń aldymda - adamdardyń ómirin saqtaý úshin vakınanyń mańyzdylyǵyn túsindirý jáne shuǵyl túrde ekpe jumystaryn uıymdastyrý mindeti turdy. Shuǵyl sharalardy qabyldaýdyń nátıjesinde Qyzylorda qalasynda 200 tósek orynǵa arnalǵan modýldyq juqpaly aýrýlar aýrýhanasy jumysyn bastady. Negizgi mamandyǵym qarjyger bolǵandyqtan, bıýdjetti josparlaý jáne tıimdi jumsalýyna erekshe mán berdim. Ásirese, aýrýhanalarǵa qajetti qural-jabdyq satyp alýǵa kóńil bóldik. Ákim orynbasary retinde negizgi jumysymnyń biri - eńbek daýlaryn sheshý edi. Kásipodaqpen birge tıimdi sheshim qabyldaý nátıjesinde munaıshylardyń eńbek daýlaryn retteý maqsatynda jumysshylardyń jalaqysyn ósirý týraly kelissózderdi sátti júrgizdik. Eńbek naryǵyna qatysty jastardyń jumyspen qamtylýyna erekshe mán berip, jumys berýshilerdiń suranysyna sáıkes oqýdy bitirgen azamattardyń 97 paıyzy jumyspen qamtyldy»,– dedi sheneýnik.
Sondaı-aq ol jumystan óz erkimen ketkenin de atap ótti.
«Ózderińiz bilesizder, Nurlybek Mashbekuly Nálibaev oblys ákimi qyzmetine taǵaıyndalǵan ýaqyttan bastap, maǵan ekonomıka, qarjy salasyna jetekshilik etýdi qosymsha júktedi. Degenmen, sáýir aıynan bastap týǵan aǵamnyń balasy Asylbek Shámenov qala ákimi retinde qyzmetke keldi. Asylbek Shámenovtyń Jalaǵash aýdany ákimi bolǵan kezeńde maǵan tikeleı baǵynystylyǵy joq bolǵandyqtan, bul jerde zańǵa qaıshy áreketter oryn alǵan joq. Biraq, sáýir aıynan bastap, qarjy salasyna jetekshilik etetindikten jáne jıenimniń qala ákimi qyzmetine kelýi sebepti men oblys ákiminiń orynbasary qyzmetinen ketý týraly sheshim qabyldadym. Degenmen, men qaı kezde de Syr eliniń damýyna bar kúsh-jigerimdi salýǵa daıynmyn»,— dep túsindirdi Baljan Shamenova.
«Adyrna» ulttyq portaly
