Búgin Almatyda «Venalyq bal» formatynda sońǵy qońyraý ótti. «Zerde» mektebiniń 15 jyldyq mereıtoıy aıasynda uıymdastyrylǵan sharaǵa 400 oqýshy qatysty.
Mekteptiń negizin qalaýshysy Gaýhar Nurovanyń aıtýynsha, jaqynda taǵy bir qazaq tildi zamanaýı jańa mektep ashylady.
«Zerde» mektebiniń ashylýyna tuńǵysh balamyz áser etti. Ony Almatydaǵy jekemenshik mektepterdiń birine ornalastyrdyq. Ókinishke qaraı, keıin ol jabylyp qaldy. Balamnyń synyp jetekshisi bizge jekemenshik mektep ashýǵa keńes berdi. Aqyldasa kele, joldasym ekeýimiz ıdeıany júzege asyrýdy jón kórdik. Búginde «Zerde» mektep-gımnazııasy elimizdiń bilim berý naryǵynda óz orny bar oqý ornyna aınaldy. Jaqynda jańa qazaq tildi jańa mektep ashýdy josparlar otyrmyz», – dedi mekteptiń damý jónindegi dırektory.
Bıyl qyrkúıek aıynda iske qosylatyn «Zaman school» mektebi «Zerde» mektebiniń dástúrin jalǵastyratyn bilim berý uıymy bolmaq. Mektep dırektory Kúljan Sadýeva mektep ulttyq salt-dástúrdi saqtaı otyra balaǵa zamanaýı talaptarǵa saı bilim beretinin aıtty.
«Zaman school – 590 orynǵa shaqtalǵan jańa formattaǵy qazaq tildi mektep. Qazaqtyń dástúrine saı tárbıe berýdi josparlar otyrmyz. Zaman talabyna saı matematıka men aǵylshyn tili pánderi tereńdetilip oqytylady. Orta jáne bastaýysh mekteptiń baǵdarlamasynda matematıka páni sıngapýrlyq ádispen jáne ǵylym sabaqtary Kembrıdj ýnıversıtetiniń júıesi boıynsha júrgiziledi. Sondaı-aq joǵary synyp oqýshylaryn IELTS, TOEFL jáne SAT halyqaralyq emtıhandaryna qarqyndy túrde daıyndaımyz. Mekteptiń arhıtektýrasy aǵylshyn stılinde jasalǵan», – dedi ol.
Onyń aıtýynsha, mektep Ile Alataýynyń baýraıynda ornalasqan jáne Almaty qalasyndaǵy eń mańyzdy 10 jobanyń qataryna engen.
Akademııalyq bilimi tereńdetilgen mektepte robototehnıka, shahmat, qarjylyq saýattylyq boıynsha sabaqtar júrgiziledi. Sondaı-aq ulttyq qundylyqtardy saqtaý, qazaqtyń ónerin nasıhattaý maqsatynda dombyra sabaǵy júrgiziledi, ulttyq sport túrleri, oıyndar oınatylady.
