QR Parlamenti Májilisi depýtattarynyń kezekten tys saılaýy 19 naýryzda ótedi. Bul týraly Aqordanyń baspasóz qyzmeti habarlady, dep jazady "Adyrna" ulttyq portaly.
Memleket basshysy 2023 jylǵy 19 qańtardaǵy Jarlyǵymen jetinshi saılanǵan Qazaqstan Respýblıkasy Parlamentiniń Májilisin taratyp, Qazaqstan Respýblıkasy Parlamenti Májilisi depýtattarynyń kezekten tys saılaýyn 2023 jylǵy 19 naýryzǵa taǵaıyndady.
"Endi Májilis depýtattarynyń 70 paıyzy partııalyq tizim arqyly, al qalǵan 30 paıyzy bir mandatty okrýgterden saılanady. Oblystar men respýblıkalyq mańyzy bar qalalardaǵy máslıhat depýtattary da aralas júıe boıynsha saılanady. Depýtattardyń 50 paıyzy bir mandattyq júıe arqyly, 50 paıyzy partııalyq tizim boıynsha ótedi. Al aýdan jáne oblystyq mańyzy bar qalalardaǵy máslıhat saılaýynda azamattar bir mandatty okrýgterden shyqqan kandıdattarǵa daýys beredi. Osylaısha, Májilis pen máslıhattar jańa úlgi boıynsha jasaqtalady. Sonda saılaýshylardyń múddesi jalpyulttyq jáne aımaqtyq deńgeıde tolyq qorǵalady. Ókildi bılikke túrli kózqarastaǵy azamattardyń kelýine múmkindik týady. Azamattyq qoǵamnyń odan ári damýyna aıtarlyqtaı jaǵdaı jasalady.
Munyń bári saıası básekeni kúsheıtedi, saıası júıeniń ashyqtyǵyn qamtamasyz etedi. Sondaı-aq saıasatkerlerdiń jańa býynynyń qalyptasýyna jol ashady. Saılaý naýqanyn uıymdastyrý jáne ony ótkizý isinde aýmaqtyq saılaý komıssııalary mańyzdy ról atqarady. Endi oblystyq saılaý komıssııalary kásibı túrde turaqty jumys isteıdi. Bul sheshim saılaýǵa qatysty is-sharalardyń sapaly atqarylýyn qamtamasyz etedi. Aldaǵy saılaýdyń zańǵa sáıkes ótýine, ádil ári ashyq bolýyna qatań baqylaý jasalady. Buǵan Ortalyq saılaý komıssııasy jáne Bas prokýratýra jaýapty. Saılaý naýqanyn otandyq jáne halyqaralyq baıqaýshylar jiti qadaǵalaıdy. Osy tusta azamattarymyzdyń baıqaýshy retinde belsendilik tanytýy mańyzdy. Zańǵa saı barlyq kandıdat pen partııanyń buqaralyq aqparat quraldaryna shyǵýyna birdeı múmkindik beriledi.
Osy saılaý naýqany elimizdegi saıası mádenıettiń joǵary ekenin aıqyn kórsetip, qoǵamymyzdy uıystyra túsedi dep senemin. Biz damýdyń jańa dáýirine qadam bastyq. Qazaqstanda qarqyndy jáne jan-jaqty jańarý úderisi júrip jatyr. Bul saılaý qoǵamdaǵy ózgeristerdiń kórinisi retinde saıası júıemizdiń odan ári jańǵyrýyna zor yqpalyn tıgizedi. Qazir álemde dál osyndaı aýqymdy ózgeristerdi qolǵa alǵan memleketter kóp emes. Májilis pen máslıhattar saılaýy memlekettik bılik ınstıtýttaryn jańǵyrtý jumystarynyń qorytyndy kezeńi bolmaq. Osylaısha, «Kúshti Prezıdent – yqpaldy Parlament – esep beretin Úkimet» qaǵıdaty tolyq iske asady. Biz bir el, bir halyq bolyp, Ádiletti Qazaqstandy quryp jatyrmyz. Osy jolda túrli syn-qaterdi eńserip, kóptegen mańyzdy mindetti birge atqarýymyz kerek. Men barshańyzdy azamattyq jaýapkershilik tanytyp, Májilis pen máslıhat saılaýyna belsene qatysýǵa shaqyramyn", - dedi Toqaev.
"Adyrna" ulttyq portaly
