Osy jyldyń 3 mamyrynan bastap Túrkilerdiń rýhanı Astanasy Túrkistannan Stambýlǵa tikeleı ushaqpen jetýge múmkindik ashylady. Túrik áýe joldary 3 mamyrdan bastap Túrkistan-Stambýl baǵyty boıynsha ushaq reısteri ashylatynyn málimdedi dep habarlaıdy «Adyrna» ulttyq portaly derekkózge silteme jasap.
Qazaqstan Ónerkásip jáne ınfraqurylymdy damytý mınıstrliginiń habarlaýynsha, ushaq reısteri aptasyna úsh ret qatynaıtynyn aıtty. V-737 tıptegi ushaqtarmen endi qazaqstandyqtar Túrkııaǵa alańsyz baryp qaıtatyn bolady. Sonymen qatar Túrkistan áýejaıynan aldaǵy ýaqytta Bishkekke jáne Tashkentke de tikeleı ushaq reısteri ashylatyny da osy aqparatta sóz etilgen.
Esterińizge salyp óteıik, bıylǵy 21 naýryz kúni Túrkistan halyqaralyq áýejaıynan Stambýlǵa alǵashqy reıs saparǵa shyqqan bolatyn. Fly Arystan áýe kompanııasy óte arzan ushaq bıletterin satyp, qazaqstandyqtarǵa Túrkııaǵa baryp kelýine úlken jaǵdaı jasaǵan. Endi aldaǵy ýaqytta Túrik áýe joldary óz ushaqtaryn Túrkistan-Stambýl baǵytyna qossa, árbirińizge Túrkııany kózben kórip qaıtý asa qıynǵa soqpaıtyny anyq. Óıtkeni, áýe kompanııa reısteri neǵurlym kóp bolsa, soǵurlym ushaq bıletiniń baǵasy da tıimdi bola túsedi emes pe?! Olaı bolsa, Túrkııany kórý endi burynǵydaı arman bolmaıtyn shyǵar.
"Adyrna" ulttyq portaly.
