At ábzelderi

2354

Ańdatý

Balapanym – Zańǵarym,

Erkelegen qulynym,

Alda seniń armanyń,

Alda seniń ǵumyryń.

 

Jaınasyn gúl ómiriń,

Erteńińdi oıladym.

Azamat dep seni, ulym,

Tulparyńdy saıladym.

 

Bul ómirde bolatyn

Jeńis te bar, synaq ta,

Qaı kezde de seni atyń

Jetkizedi muratqa.

 

Batyrlardaı bas alǵa,

Qolyńa eldiń al týyn.

Er-turmanyń qashan da,

Bútin bolsyn, altynym.

 

Minbeı atqa áýeli,

Ábzelderin bilersiń.

Bilip, tanyp sen ony,

Alamanǵa kirersiń.

 

Dástúrińdi jalǵaǵan

Ár ábzeldiń syry bar.

Kóńil qoıyp, jan  balam,

Aıtqanymdy uǵyp al.

 

Júgen 

Kóńilińmen umtylǵan

Bilseń eliń súıiner.

Júgen atty bul turman

At basyna kıiler.

 

Atpen kezip alapty,

Alystarǵa zaýlaısyń.

Al júgensiz sen atty

Baǵyndyra almaısyń.

 

Júgenniń kóp túr-túri,

Jasaý da ony bir eńbek.

Nebir asaý jylqyny

Úıretersiń júgendep.

 

Dala kezgen, taý kezgen

Qarǵyp minip jylqyǵa,

Janýardy ár kezde

Kóndire bil yrqyńa.

 

Toqym 

Kóńil bólip, aqyldym,

Nazar aýdar toqymǵa!

Qaı kezde de atyńa

Toqym salmaı otyrma.

 

Jaramaıdy qur turǵan,

Kóp bilýge talaptan.

Ázirlener bul turman

Barqyt, kıiz, manattan.

 

Saparyńdy bastasań,

Artyq emes bilgeniń.

Toqym salsań,

Eshqashan

Jaýyr bolmas mingeniń.

 

Er-toqym  

Babam aıtyp aqylyn,

Bizge er-toqym  qaldyrǵan.

Ony mingen atynyń

Arqasyna qondyrǵan.

 

Sándi ári qonymdy,

Saıgúlikke jarasqan.

Jasalady er kádimgi

Temir menen aǵashtan.

 

Eń baǵaly jádiger,

Bes bólshekten quralǵan.

Alty alashqa málim er,

Onyń da bar túri alýan.

 

Er-toqymnyń kádeli

Aldyńǵy, artqy qasy bar.

Belaǵashqa ádemi

Eki qaptal qosylar.

 

Qazaqy er men qalmaqy er,

Qusbas, oıma,  boqan er.

Aqbas, qyrǵyz, qanbas er,

Qozyquıryq, qoqan er...

 

Qasterleıdi muramdy el,

Taralǵan keń túr-túri,

Kórsetedi bul ábzel

Ásem etip jylqyny.

 

Aıyl 

Tulpar minseń, aqyldym,

Aıylyn tart durystap.

Turady ol atyńnyń

Er-turmanyn nyq ustap.

 

Ábzeldiń bil tártibin,

At baýyrynan ótkizip.

Bar kúshińmen tart, ulym,

Shet-shegine jetkizip.

 

Onyń eki túri bar:

Shap aıyl men tós aıyl.

Mánin, balam, uǵyp al,

Mańyzdy atqa osy aıyl.

 

Aıyldy ásem ár sheber

Jasaıdy  esip qaıystan.

Aıyl myqty bolsa eger,

Jeńersiń san saıysta.

 

Qanjyǵa 

Er jigittiń janynan

Qanjyǵasy saılanar.

Oljasymen tabylǵan

Sol qanjyǵa maılanar.

 

Qansonarǵa saı bolsa,

Ańshy atanar taǵy da er.

Al qanjyǵań maılansa,

Súısinedi qalyń el.

 

Úzeńgi 

Myqty bolsa úzeńgi,

Tulparyńmen zaýlaısyń.

Myǵym ustap tizeńdi,

At ústinen aýmaısyń.

 

Qos qaptaldan bul qural

Er-toqymǵa jalǵanǵan.

Tek bıikke umtylar

Oǵan aıaq salǵan jan.

 

At ábzeli jaltyrap,

Soǵylady temirden.

Úzeńgimen arǵymaq

Tartymdy bop kóringen.

 

Ómildirik 

Ol daǵy erdiń bólshegi,

Atqumar jan uǵady.

Ómildirik bolsa, eriń

Qozǵalmastan turady.

 

Arǵymaqqa ár berip,

Keýdesine kıiler.

Áshekeımen sándenip,

Shashaq baýmen túıiler.

 

Jasaıdy ony sheberler

Bylǵary men qurymnan.

At ábzelin ónerli el

Qazynam dep uǵynǵan.

 

Tebingi

Al bir ábzel – tebingi,

Jón bári saı bolǵany.

Sándep turar erińdi

Juqa kıiz ol daǵy.

 

Saltanatty er kádimgi

Tabylar úı tórinen.

Kıimińdi tebingi

Saqtaıdy attyń terinen.

 

Quıysqan

Ár kezde sen jańylma,

Quıysqandy qolyńa al.

Kim biledi, jolyńda

Kedergiler jolyǵar.

 

Quıysqansyz sar jelgen

Arǵymaqtyń sáni joq.

Saqadaı saı ábzelmen

Qorqýdyń esh jóni joq!

 

Sát sapar! 

Atqa minip babalar,

Elin, jerin qorǵaǵan.

Tulparymen jáne olar

Jarty álemdi jaýlaǵan.

 

Qambar ata túligin

Er qanaty sanaǵan.

Jylqyǵa arnap ǵumyryn,

Serigine balaǵan.

 

Rýhy bıik, ór eliń

Saltymyzdy  damytqan.

Atqa miný ónerin

Bar álemge tanytqan.

 

Altynnan da zor quny

Qurmetteı bil saltyńdy,

Atyń ozyp ár kúni,

Asyra ber dańqyńdy!

 

Oljas QASYM

 

Pikirler
Redakııa tańdaýy