Nobel úshin talas: Beıbitsúıgish lıder kim?

2654
Adyrna.kz Telegram

«Nobel komıteti Reseı prezıdenti Vladımır Pýtınniń kandıdatýrasyn 2021 jylǵy Nobel syılyǵyna úmitkerler tizimine qosty» degen aqparat eki-úsh kúnniń sheginde orys aqparat keńistiginde yzý-qyzý talqylanyp jatyr.

Pýtınniń kandıdatýrasy úmitkerler tizimine qosylǵany týraly aqparatty reseılik jazýshy Sergeı Komkov taratqan. Prezıdent Pýtındi Nobeldiń Beıbitshilik syılyǵyna usynǵan da osy jazýshy Komkov bolǵan. Ol óz usynysyn 2020 jyldyń 9 qyrkúıeginde jibergen. Al 10 qyrkúıekte Komkovtyń ótinimi Oslodaǵy Nobel komıtetiniń qaraýyna túsken.

Komkovtyń aıtýynsha, bıylǵy Nobel syılyǵyna 286 adam úmitker retinde tirkelipti. «Vladımır Pýtıninń naqty básekelesteri kim ekeni belgisiz. Óıtkeni, Nobeldiń qupııalylyq erejeleri bar», - degen Komkov Reseı prezıdenti Vladımır Pýtın Nobeldiń Beıbitshilik syılyǵynyń talaptaryna saı keletin saıası tulǵa ekenin aıtqan.

Aıtpaqshy, jazýshy Sergeı Komkov osyǵan deıin 2014 jyly da Vladımır Pýtındi Nobel syılyǵyna usynǵan edi. Ol kezde jazýshy Vladımır Pýtıninń «Taıaý Shyǵys pen Súrııadaǵy janjaldy retteýdegi eńbegi» úshin usynylǵanyn aıtqan.

Al bıylǵy usynysqa qatysty prezıdent Pýtınniń baspasóz hatshysy Dmıtrıı Peskov: «Eger Pýtın bul syılyqty alsa jaqsy bolar edi. Tipti, almaı jatsa, eshteńe etpeıdi», - dep pikir bildirgen.

Bıyl Reseı atynan Nobelge usynylǵan taǵy bir saıasatker – Sheshenstan lıderi Ramzan Qadyrov.

Qadyrovty bul syılyqa: «Sheshen jerinde 15 jyldan beri beıbitshilik pen turaqtylyqty qalyptastyryp kele jatqany úshin», usynypty.

Al Qadyrovtyń ózi bolsa: «Soltústik Kavkazdaǵy sodyrlarmen kúresim úshin Nobelge ábden laıyqpyn», - depti BAQ-qa.

Bıyl AQSh-tyń burynǵy prezıdenti Donald Tramp ta Nobel syılyǵyna usynylǵan edi. Usynýshy – Eýropa parlamentiniń Estonııadan saılanǵan ókili Iak Madıson.

Madıson óz málimdemesinde Trapmty «sońǵy 30 jylda eshqandaı jańa soǵys bastamaǵan birden bir AQSh prezıdenti» dep sıpattap, Arab Ámirlikteri men Izraıl elderin kelistirý úshin jasaǵan eńbegi úshin Nobeldiń Beıbitshilik syılyǵyna usynatynyn aıtqan.

AQSh-tyń qazirgi prezıdenti Djo Baıden de bul syılyqtan úmittiler qatarynda. Baıdendi Brıtanııanyń Leıborıstik partııasynyń ókili Krıs Braıant usynǵany BAQ-ta jarııalanǵan.

Ol óz ýájinde: «Kóp saıasatker qarýdyń kúshine júginip júrgende, Baıden argýmenttiń kúshine arqa súıeıdi», - degen.

Bıylǵy Nobel syılyǵyna úmitkerler qatarynda qazir qamaýda otyrǵan reseılik oppozııoner saıasatker Alekseı Navalnyı men Belarýs azamattyq qoǵamynyń, oppozıııasynyń hám qarsylyq qozǵalysynyń lıderi Svetlana Tıhanovskaıa da bar. Sondaı-aq, Dúnıejúzilik densaýlyq saqtaý uıymy (DDSU), Black Lives Matter qara násildilerdiń ómirin qorǵaý qozǵalysy, NATO men BUU-nyń bosqyndar máselesi jónindegi agenttik te Nobelge usynylǵan.

Aqparat úshin: 2010 jyldan beri qaraı Nobeldiń Beıbitshilik syılyǵy memleket lıderlerinen Lıberııanyń 24-shi prezıdenti Elen Djonson-Serlıfke (2011 jyly), Kolýmbııanyń burynǵy prezıdenti Hýan Santosqa (2016 jyly) jáne Efıopııa premer-mınıstri Abı Ahmed Alıge (2019 jyly) berilgen.

Nurgeldi ÁBDIǴANIULY,

"Adyrna" ulttyq portaly

 

 

Pikirler