"Qara batyr" laqap atymen tanylǵan chempıon: aýyl balalaryn sportqa tárbıelegim keledi

4505
Adyrna.kz Telegram

«Qara batyr» laqap atymen kók týymyzdy jelbiretip, qazaqtyń atyn aıqara asyryp júrgen sportshylarymyzdyń biri – Meırambek Aıǵalıev.

Qulsary qalasynyń týmasy Meırambek Djıý-djıtsýdan álem chempıonatynyń birneshe dúrkin júldegeri. «Adyrna» ulttyq portalynyń tilshisi sportshymen tildesip, aldaǵy josparlarymen bólisti.

Qazirgi tańda 11 synypta oqıtyn Meırambek aldaǵy bilimin de osy sportpen baılanystyrǵysy keletinin jetkizdi.

Ustazy, jetekshisi álemniń birneshe dúrkin chempıony, «Qazaqstannyń júz jańa esimine» engen, Áskerı sambodan Qazaqstan Respýblıkasynyń sport sheberi – Talǵat Jumaǵalıev.

Alǵashqy qadam

-Sport jolyna qyzyǵýshylyń qaı jastan paıda boldy?

-Sportqa degen qyzyǵýshylyǵym 9 jasymda bastaldy. Ózimniń aǵam ári jetekshim, ustazym Talǵat Jumaǵalıev meniń shıraqtyǵymnan sportqa ıkemimdi baıqap, jattyǵý zalyna apardy. Bári sol jerden bastalǵan edi. «Osy baladan birdeńe shyǵady» degen leppen ustazymnyń arqasynda qazir jattyǵýsyz bir kúnim de ótpeıdi.

-Eń alǵash rıngke shyqqan kezińde qandaı sezimde boldyń?

-Eń alǵash rıngke 9 jasymda oblys aralyq týrnırde shyqtym. Árıne, senimnen kóri qorqynysh basym boldy. Maǵan kórsetilgen qoldaýdyń arqasynda fınalǵa óttim. Ózimnen biraz jas úlkendermen baq synastym. Biraq, jeńilis taptym. Odan qanatym qaıyrylmady. Kerisinshe, jeńiske qaraı qadamym nyǵaıa tústi. Jeńilisti múmkindik retinde qabyldaımyn. Demek, áli jeńýge múmkindik bar degen senim kúsheıedi.

-Óńirde seni kóbi “qara batyr” laqap atymen tanys. Bul ataýdy kim usyndy?

-Sheshenstan sportshylarymen jarys bolǵaly jatty. Qyzyǵy jarys bizdiń aýylda ótti. Basqa elderden kóptegen sportshylar bizdiń aýylǵa jınaldy. Úlken mártebe. Rıngke shyǵar aldynda laqap at izdestire bastadyq. Basynda «Chernyı pantera,tıgr» degen ataýlardy qarastyrdyq. Alaıda jetekshim «Qara batyr» ataýyn usyndy. Ózime qatty unady. Bir jaǵynan ózge ult ókilderiniń arasynda qazaqy esimmen shyqqanymnyń ózi rýhty kóteredi emes pe?

-Bolashaǵyńdy sportpen baılanystyrasyń ba? Alǵa qoıǵan qandaı josparlaryń bar?

-Bolashaqqa jospar kóp, arman qurýly tur. Basty maqsat kók týymyzdy álemdik arenada jelbiretýdi toqtatpaý. Ózim de shákirtpin. Aldaǵy ýaqytta meniń de shákirtterim bolǵanyn qatty qalaımyn. Aýylymnan shyqqan jastardy chempıon qylý oıda júrgen úlken armandarymnyń biri. Bolashaqta UFC tórinen ózimdi kórgim keledi. Ózim ol alańǵa shyqpasam da, shákirtterim boı kóteretindeı azamat bop óskim keledi.

-Jaraqat alǵan sátteriń boldy ma? Densaýlyǵyńa zııan kelgen kezder she?

-Sport densaýlyqqa paıdasyn tıgizbese zııany esh tımeıdi. Únemi jattyqsaq, sondaı-aq dárýmender qabyldap júrsek densaýlyq syr bildirmeıdi dep oılaımyn. Ázirge esh jarystan jaraqat almadym. Almaıaq ta qoıaıyn.

-Sońǵy barǵan jarys sáti qalaı boldy?

-Ýfa qalasynda ótti. 2-shi oryndy ıelendim. Ádettegideı, asa bir qıynǵa soqpady. Endigi maqsat bas júldege talasý, chempıon ataný.

Josparlaryń oryndalsyn! Kóp raqmet!

Injý ÓMIRZAQ,

"Adyrna" ulttyq portaly 

 

 

Pikirler