Қара теңіздің ресейлік бөлігіндегі дауылдың салдарынан Ресей мен Қазақстаннан Каспий құбыр консорциумы (КҚК) арқылы мұнай экспорты тәулігіне 1 млн.баррельге немесе әлемде өндірілетін мұнай көлемінің 1% - на қысқаруы мүмкін, деп жазады "Адырна" ұлттық порталы.
Қара теңіздің ресейлік бөлігіндегі дауыл Қазақстаннан әлемдік нарыққа мұнай тасымалдайтын әлемдегі ең ірі мұнай құбырларының бірі КҚК-ның тиеу жабдығын зақымдады, деп хабарлады сейсенбі күні оның операторы.
Ресейдің Энергетика министрінің орынбасары Павел Сорокин екінші айлақтың да зақымдануы мүмкін екенін айтты. Шенеуніктің айтуынша, жөндеу жұмыстары екі айға созылуы мүмкін, бұл мұнай экспортын тәулігіне 1 миллион баррельге қысқартуы мүмкін.
КҚК құбыры Ресейдің Украинаға басып кіруінен кейін Ресейдің экспортын шектеп, мұнай бағасын шарықтатып жібергеннен бері көпшіліктің назарын аударып келеді. АҚШ ресейлік мұнайға санкция салды, бірақ ел билігі Қазақстаннан Ресей арқылы өтетін мұнай ағыны тоқтаусыз жалғасуы керектігін айтты.
Бұл құбыр арқылы күніне шамамен 1,2 миллион баррель тасымалданады, бұл әлемдік сұраныстың 1,2% құрайды. Оның жұмысындағы кез келген елеулі үзіліс 1970 жылдардағы араб мұнай эмбаргосынан бергі ең нашар жеткізілім дағдарыстарының бірін бастан кешіріп жатқан әлемдік мұнай нарығына қосымша ауыртпалық түсіреді.
Құбырдағы мұнайдың басым бөлігі Ресей, Қазақстан және «Шеврон» сияқты халықаралық мұнай компанияларына тиесілі. Ол Ресейдің Қара теңіздегі Новороссийск портынан мұнай экспорттайды. Chevron өкілі компания «қазіргі уақытта жағдайды бағалауда» деді.
"Адырна" ұлттық порталы
