Ресей мен Қытай стратегиялық бомбалаушы ұшақтарын ұшырды

2102
Adyrna.kz Telegram
Фото: cdn.profile.ru
Фото: cdn.profile.ru

Ақ үйдің мәліметінше, Ресей Шығыс және Оңтүстік Қытай теңіздеріндегі көршілерімен болған аумақтық дауларда Қытайды қолдайтын болады, деп хабарлайды "Адырна" ұлттық порталы "golosameriki.com" сайтына сілтеме жасап.

"Ресей мен Қытай стратегиялық бомбалаушы ұшақтарының Шығыс Азияға бірлескен рейсі екі елдің байланыстарының қаншалықты жақын екенін көрсетеді", — деді АҚШ әкімшілігінің жоғары лауазымды қызметкері.

Reuters агенттігінің хабарлауынша, Ресей Қорғаныс министрлігі Жапония мен Шығыс Қытай теңіздерінде Қытаймен бірге 13 сағат бойы жасаған аспан патрульдіктерін растады. Патрульге ресейлік стратегиялық бомбалаушы Ту-95 және Қытайдың Xian Н-6 ұшағы қатысты. Жапон және Оңтүстік Корея әуе күштерінің ұшақтары ұшудың бір бөлігінде олардың соңынан ерді.

Ресей мен Қытай стратегиялық авиациясының бірлескен мүмкіндіктерін көрсету АҚШ президенті Джо Байденнің аймаққа сапарымен тұспа-тұс келді. Сейсенбі күні ол Токиода «Төртжақты қауіпсіздік диалогы» аясында Жапония, Австралия және Үндістан басшыларымен кездесті, оның мақсаттарының бірі Қытайдың аймақтағы өсіп келе жатқан ықпалына қарсы тұру болды.

Еске салайық, бұл Байденнің президент ретінде Азияға жасаған алғашқы сапары болатын. Президент Оңтүстік Корея мен Жапонияда болды. Сапар барысында Ақ үй басшысы АҚШ өзінің одақтастарымен және серіктестерімен бірге еркін және ашық Үнді-Тынық мұхиты аймағын құруға ұмтылуға ниетті екенін айтты.

Қытай мен Ресей бұған дейін стратегиялық бомбалаушы ұшақтардың бірлескен жаттығуларын өткізген болатын, бірақ сейсенбі күнгі рейс Ресейдің 24 ақпанда Украинаға басып кіруінен кейінгі алғашқы рейс болды.

"Бұл Қытайдың әлі де Ресеймен, соның ішінде әскери салада тығыз жұмыс істеуге дайын екенін білдіреді, - деп түсіндірді АҚШ ресми өкілі. — Қытай Ресейден алшақ жатқан жоқ. Керісінше, бұл жаттығулар Қытайдың Ресейдің батыста соғысып жатқанда шығыста өзін қорғауға көмектесуге дайын екенін көрсетеді".

 

  "Адырна" ұлттық порталы

Пікірлер