Алматы қаласының Сыбайлас жемқорлыққа қарсы қызметі мемлекеттік сатып алу жүйесіне жүргізілген мониторинг барысында кітап сатып алу барысындағы қымбатшылық фактісін анықтады, деп хабарлайды «Адырна» тілшісі.
«Биыл мегаполистің жоғары оқу орындарының бірінде 117 млн теңге сомасына бір дана көлемінде кітап сатып алу жоспарланған болатын. Мониторинг барысында сипаттамаларда тауарлардың атауы, сондай-ақ жоғарыда аталған кітаптың авторы жоқ екендігі анықталды»,– делінген хабарламада.
Мекеме мемлекеттік сатып алу порталында жылдық жоспарды орналастыру кезінде техникалық қателік жібергенін хабарлады. Университеттің мәліметінше, бұл шығын бір кітапқа емес, бір лотқа жоспарланған.
Айта кетейік, Антикор 2021 жылға арналған мониторинг бойынша 13 миллиард теңгеден астам бюджет қаражатының тиімсіз жұмсалуының алдын алды.
