Әлемнің ең үздік футболшысы кім? Бұл сұрақкөпке ұнамауы мүмкін. Себебі, сұрақ төңірегінде келіспеушілік көп. Бірі – Роналду, екіншісі – Азар, ендігісі – Коутиньо дер. Бәрі әртүрлі санат бойынша үздік. Сол категорияларды бір ойыншыдан іздесеңіз, жауабы – Месси. Аргентинада Росарио атты қала бар. Сол қалада кішкентай Лео арманын ала доппен байланыстырған. Сан Луис көшесімен доп теуіп келе жатып, кейін өз атында көше боларын сезді ме екен? Мартин Мигель де Гюмес ескерткішін көргенде, өзіне бір емес, үш ескерткіш қойыларын ойлады ма екен? Кім білсін? Бірақ оның бір ойы белгілі. Ол футболмен мәңгі бірге болғысы келді. Әжесі жанына ерткен бала бүгін біртүрлі қобалжулы. Түндегі жай маза берер емес. Түсі ме, өңі ме белгісіз, оған бір кісі келді. Қолында добы бар. Орташа бойлы, аққұба келген, сақалы бар. Киген киіміне қарағанда, футболшы секілді. Қолындағы допты ұстатып жатып, «қандай қиындық кездессе де, арманыңнан бас тартпа» деді. Леоға қарап тұрып, жылы шыраймен жымиды. Енді тіл қатамын дегенше, бейне жоқ болып кетті. Кішкентай Андрес ұзақ ойланып жатып, ұйқыға кетті. Таңертең әжесі күндегі әдетімен немересін оятты. Таңғы асын ішкізіп, Леоны кезекті жаттығуға апармақ. Сүт ішіп отырған немересіне бүгін медициналық тексерістен өту керек екенін түсіндіріп жатыр. Леоны киіндіріп, керек-жарағын алып, спорт қалашығына бет алды. Жол бойы Лео кешегі ғажайыптың жұмбағын шешумен дал болды. «Неге футболшы аға маған келді? Айтқан сөзі қандай әсерлі. Спорт формасын айтсаңшы. Маған берген добы да өзгеше секілді. Росариода ондай доп жоқ» деген сан сұрақ баланың мазасын қашырды. Әжесіне айтқысы-ақ келеді. Айтайын десе, онсыз да жасы келген қартты мазалағысы келмейді. Бар тірлігін тастап, осы баланың қамымен жүр. Селия әже немересінің өзгеден ерек екенін жақсы түсінеді. Кішкентайынан әлсіз, жиі ауырады. Сондықтан баланың болашағына алаңдайды. Алаңдайды да, жанынан бір елі айырылмайды. Әр нәрсені ойлап, қалашыққа қалай жеткенін білмей де қалыпты. Әжесі мұны бірден тексеріс жүріп жатқан жерге әкелді. Мариолар баяғыда келген екен, Санчесті дәрігерлер тексеріп жатыпты. Әжесімен бірге кезекке тұрды. Бақса, тексеріс бұрынғыға ұқсамайды. Мұның алдында бір топ бала қан талдамасы мен флюрографиядан өткен. Соның нәтижесін хабарлап, оған қоса тағы бірнеше тексеруден өтеді екен. Көп күтпей Леоның кезегі келді. Медбике әжесі екеуін бас дәрігердің кабинетіне апарды. Дәрігер жылы амандасып, мән-жайды түсіндіріп жатыр. – Селия ханым, талдама нәтижелері көңіл қуантпайды. Леоның өсу гармоны тоқтаған. Керекті ем-дом шараларын жасамасақ, бала ары қарай өспей қалады. Өспесе, футбол ойнауды да доғару керек. Лео онсыз да кішкентай, жалғастыра берсе, сүйекке зақым келеді. Әжесінің жанарына жас толып кетті. Немересіне үздіге қарап тұрып, дәрігерден бағасына қарамай емдеу курсынан өтетінін айтты. Дәрігер ағай әжесіне бірдеңелерді түсіндіріп жатыр. Ол ендігі сөздерді естімеді. Леоның қиял әлемінің күл паршасы шықты. Осыдан 10 минут бұрын ойында «әлемнің үздік ойыншысы болам» деген мақсат бар-ды. Ақ-көк жейдеде Марадона сияқты аргентиналықтардың арманын орындағысы келетін. Енді қайтпек? Ойына түндегі жайт түсті. «Тұра тұр, футболшы аға бәрін білген екен ғой. Менің қайткенде де, арманымнан бас тартпауым керек. Сонда мен де дәл сол ағай секілді боламын» деді ішінен. Ендігіде өзін қамшыламаққа бекінді. Ештеңеге қарамастан, жаттығуларды жібермей, бәрінен ширақ қимылдауға тырысады. Өзі үшін жанын салып жүрген әжесінің, ата-анасының үмітін ақтағысы келеді. Мессиге күнде өсу гармонын күшейтетін дәрі береді, ине салады. Басында инеден ауырсынатын, қазір үйренісіп қалды. Жаттығудың бірін жібермейтін болды. Әжесі оятпай-ақ, өзі ертемен тұрады. Бір жылдың ішінде Леода кәдімгідей өзгеріс бар. Дене-тұрқы өскен, ойын жүйесі де өзгерген. Әкесі жаттықтыратын «Грандолидан» «Ньюэллс Олд Бойзға» ауысқан. Әкесі болғанмен, клубта қатал бапкер. Баласына артығымен жаттығу жасатады. Соның арқасында болар, Лео ойынға төселіп алды. Шабуылда небір сойқанды бастайды. Ньюэллс жанкүйерлері оның алаңдағы сиқырына үйреніп алған. Ойын сайын қолдау білдіруге келеді. Селия әжесі де немересінің бір ойынынан қалмайды. Бірде әкесі Леоның кезекті ойынын таспаға түсірген. Оның не қажеті барын бала түсінбеді. Хорхе мұны жайдан-жай істемеді. Ұлында ерекше таланттың барын біледі. Бірақ денсаулығындағы кінәраты мен қолының қысқалығы қынжылтады. Осы көктемде «Ривер Плейт» Леоны сатып алғысы келген. Алайда қажетті ем-дом шараларына ақшалары жетпейтінін айтты. Месси жанұясы күнделікті салынатын ине мен дәрумендерге ақшаны әзер тауып жүр. Әкесінің ендігі үміті – ойын бейнеленген таспада. Достары таспаны «Барселонаға» жіберуге кеңес берген. Хорхе атақты Ла-Масия туралы жиі еститін. Жас таланттардың бағын ашатын футбол академиясы екенінен хабары бар. Бүгін сол клубтан жауап келу қажет. Кешке қарай жаттығуды аяқтап, заттарын жинастыруға кабинетіне келді. Келсе, үстел үстінде конверт жатыр. Жазуын оқып, көзі шарасынан шығып кеткен. Дәл өзі күткен хат. Ақыры келіпті. Үмітін үзе бастап еді, келгені осындай жақсы болар ма? Ашып көрді, ішінде екі билет пен хабарлама тұр. «Барселона» Леоны базасына шақырыпты. 17 маусымда Каталония астанасында болуларын өтініпті. Кешкі аста жаңалықты естіген Леоның көңілі алабұртты. Асын ішпестен, добын алып далаға шығып кетті. Теуіп келе жатып, достарын, көшесін, мектебін ойлады. Оларды қалай қалдырып кетпек? Антонеланы ше? Лукаспен бірге «Ривер Плейтта» ойнаймыз деуші еді ғой. Досы мұны сатқынға баласа қайтпек? Көшенің басына жете бере, артқа бұрылды. Қараса, ешкім жоқ, қас қарайып кетіпті. Көзімен аспанды бір шалды. Биікте бір жұлдыз ерекше жарқырайды. Қайта қарағысы келді. Ұзақ қарап тұрды. Бірде жұлдыз ішінен әлгі доп берген ағайды көргендей болды. Өз ойынан шошынған секілді. Артынша, мұның бір белгі екенін түсінді. Не болса да, тәуекел десті. Бірақ танымайтын қалаға қалай бармақ? Барселонаны Росариодағыдай бағындыра алар ма екен? Ла Масия жылы шырай таныта ма? Сансыз сауалдардың жауабын іздегенше, Барселонаға аттанатын күн туды. Ертемен тұрып, Росарионың таңғы ауасымен тыныстағысы келді. «Эль Че Геварадан» бастап, Росарионың орталық стадионына дейін аралап шықты. Қимастық бар. Санта-Фемен байланысты балалық бар. Росариодан Буэнос Айреске жүретін автобус келді. Автобусқа отырарда, өне бойы жансыз қалғандай күй кешті. Әжесі үлкен өмірге қадам басқанын, енді еркелікке орын жоғын ескертті. Достары, ата-анасы, туыстары шығарып салып жатыр. Лукас пен Антонелла да бар. Антоға үзік-үзік қарап қояды. Бұл Каталонияға кеткенде, бірі қағып кете ме деп қорқады. Артынша, ағасы Лукас қарап жүрер деп өзін сабырға шақырады. Санта-Фе жаққа ойлана қарайды. Бала Лионельді Росарио көшелерінің бірінде қалдырғанын ұғынады. Келесі келгенінде, бәрі басқаша болатынын сезеді. Автобус Росарионы артқа тастап, Ла Эмилияға жақындады. Енді шегінерге жол жоқ. Алда арманымен астасқан Барселона күтеді.
Айзат Айдарқызы
https://aikyn.kz/2018/11/03/72262.html?fbclid=IwAR1uAUe87tIiNfw7k_dIBnWQY0WmgkNGuwdJuhN0N9MS4Pu0Gs1SIz3YYEM
