Қарағанды облысында 102 миллион теңге бюджет қаражатын жымқырған білім беру жүйесінің есепшілері сотталды, - деп хабарлайды "Адырна" ұлттық порталы.
Мұғалімдердің тамыз конференциясы барысында Сыбайлас жемқорлыққа қарсы қызметтің Қарағанды облысы бойынша департаментінің алдын алу басқармасының басшысы Бауыржан Хусайыновтың айтуынша, білім саласындағы сыбайлас жемқорлық тәуекелдеріне сыртқы талдау жүргізу барысында миллиондаған қаржы жымқыру фактілері анықталған. Ағымдағы жылдың мамыр айында кешенді аудит жүргізілді. Тексеру қорытындысы бойынша 8 материал Сотқа дейінгі тергеп-тексерудің бірыңғай тізіліміне, 4 материал ІІО автоматтандырылған деректер базасына тіркелді.
"Еңбекақы төлеу қорынан бюджет қаражатын жымқыру схемасын аштық. Бір айта кетерлігі, бюджетті мұғалімдер емес, олардың қызметін қамтамасыз етуге шақырылған шенеуніктер ұрлаған. Мемлекетке келтірілген шығын шамамен 102 миллион теңгені құрады. Оның 77-сі мемлекетке өтелді. Қаржы жымқыру үшін «өлі адамдар», яғни ресми түрде жұмысқа қабылданбағандардың аты-жөні қолданған. Ереже бойынша бұл бухгалтерлердің таныстары. Олардың деректері жалған лауазымдар бойынша жалпы тізімге енгізілген», - деді Бауыржан Хусайынов.
Сонымен, күдіктілердің арасында Бұқар жырау аудандық білім бөлімінің есепшісі де бар. Спикердің айтуынша, ол өткен жылдың маусым айынан бері мектепте жұмыс істемейтін жеті досына 40 миллион теңге аударған.
«Тағы бір мысал, Қарағандыда мектептердің бірінің есепшісі екі жыл бойы өзінің карточкалық шотына, туыстары мен екі мектеп қызметкерінің есепшотына белгіленген жалақыдан 18 миллион теңге көлемінде заңсыз ақша аударған. Балабақшалардың бірінің тағы бір есепшісі екі жыл ішінде өзіне 8 миллион теңгеден астам ақша аударған. Талдау бұл саладағы жемқорлықтың жүйелік сипатын көрсетеді», - деп қосты Бауыржан Хұсайынов.
Мәселені шешу үшін спикер бюджеттік үдерістерді толық автоматтандыруды қамтамасыз етуді және қарамағындағылардың сыбайлас жемқорлық құқық бұзушылықтары үшін барлық деңгейдегі басшыларды жазалауды ұсынады.
Еске сала кетейік, бұған дейін «Еңбек-Қарағандының» бас есепшісі 22 млн теңгені иемденгені хабарланған болатын. Тергеушілердің мәліметінше, 48 жастағы әйел өткен жылдың наурыз айында ІІМ ТЖК жүйесі шаруашылық жүргізу мемлекеттік кәсіпорнының Қарағанды филиалына жұмысқа орналасқан. Сәуір айынан қазан айына дейін басшының ЭЦҚ-ын қолында ұстаған ол филиал қызметкерлерінің жалақысын жоғарылатып, сосын алаяқтық жолмен артық қаражатты иемденген.
"Адырна" ұлттық порталы
