Қазақстан бокс федерациясының президенті Кеңес Рақышев Азия ойындарындағы ұлттық құрама капитаны Асланбек Шымбергеновтың жартылай финалдық кездесуінде төрешілердің шешіміне қатысты мәлімдеме жасады, деп хабарлайды «Адырна» ұлттық порталы.
«Құрметті жанкүйерлер, әлем чемпионы, Қазақстан құрамасының капитаны Асланбек Шымбергеновтың жартылай финалдық кездесуінде төрешілердің аса әділетсіз шешіміне қатысты өрескел оқиға орын алды», - деді Кеңес Рақышев.
ҚФБ басшысы Шымбергенов бүкіл жекпе-жек бойы жапониялық Севон Оказаваны соққының астына алғанын, жұдырықтары қарсыласқа дәл тигенін, барлық жағынан мықтырақ әрі басымырақ болғанын атап, нәтижесінде қарсылас жеңгенін жазған.
Сондай-ақ федерациясы президенті Қазақстан - бокс державасы, бокстың көшбасшысы ретінде рингтегі мұндай әділетсіздік фактілерімен келіспейтіндігін айтқан.
«Ханчжоудағы Азия ойындарының жартылай финалында болған оқиға шектен шықты. Осыған байланысты Қазақстан бокс федерациясы ресми түрде Халықаралық олимпиада комитетіне төреші қызметіне өз шағымдарын білдіреді. Өз тарапымнан Асланбек Шымбергеновке жеке қолдау білдіремін! Менің ойымша, мұндай фактілер біздің капитанымызды бұзбайды және ол бокстан ең маңызды халықаралық турнирлерде Қазақстанның туын көтеруді жалғастырады!»,- деп қорытындылаған ҚФБ басшысы.
«Адырна» ұлттық порталы
