Оралда студент қыз сегізінші қабаттан секіріп кеткен. Бұл туралы Батыс Қазақстан облысы полиция департаментінің мәлімдеді, деп хабарлайды “Адырна” ұлттық порталы.
Мәлімет бойынша, оқиға 21 қазан күні болған.
Сағат 13.20 шамасында 1 курста оқитын 17 жастағы қыз жатақхананың 8-қабатынан секіріп кеткен. Салдарынан ауыр жарақат алған студент Орал қаласындағы облыстық көпбейінді ауруханаға жатқызылды. Аталған дерек бойынша Орал қаласы полиция басқармасының Абай полиция бөлімі ҚР ҚК 105-бабы 3-бөлігіне сәйкес (өзін-өзі өлтіруге дейін жеткізу) сотқа дейінгі тергеу бастады, – делінген полиция хабарламасында.
Ал БҚО денсаулық сақтау басқармасы сағат 13.40-та Ж.Досмұхамедов көшесі бойындағы жатақханадан облыстық жедел жәрдем станциясына қоңырау түскенін хабарлады.
Ақпаратқа сәйкес, науқас жансақтау бөлімінде жатыр, жағдайы өте ауыр. Қазіргі кезде оқиғаның мән-жайы анықталып жатыр.