Алматыда "Спартак" стадионында" дүбірлі турнир өтті. Бұл жолы жасыл алаңда футболшылар емес, журналистер доп тепті. 45 жыл бойы ауыл мектебінде бала оқытып, ұрпақ тәрбиелеуде өлшеусіз үлес қосқан аяулы ұстаз, Казақ КСР Оқу-ағарту ісінің үздік қайраткері,Ұлы Отан соғысының ардагері, Қордай ауданының құрметті азаматы, Абай атындағы Қазақ Ұлттық педагогикалық университетінің 1948-1951 жылдардағы түлегі Ордабай Сәдібековтің құрметіне ұрпақтары керемет турнир өткізді.Таң атқаннан басталған турнир кеш бата тоқтады. Екі топқа бөлінген 10 команда жан алып, жан берісті. Финалда Ордабай ақсақалдың ауылы Қордай ауданы Кененнен келген «Кенен-1» командасының аяқдопшылары мен алматылық «Қаламгер» журналистер құрамасы кездесті. Талай республикалық БАҚ өкілдері арасындағы турнирлердің жеңімпаздарына қарсы ауданаралық сайыстардың шаңын шығарып жүрген Кенен ата атындағы ауылдың аяқдопшылары қарсы кездесті. Ойын өте ширыққан жағдайда өтті. Республикаға есім-сойы белгілі Жанарбек Әшімжан, Жандос Айтбайұлы бастаған журналистер өте қарқынды бастады матчты. Бірақ, Айдар Әуезтайұлының тәлімін алған Кенен ата ауылы оңайлықпен алдырмады. Алдырғаныңыз не 2:1 есебімен жеңіске жетті.
Ал қола жүлде алаң иелері «Абай атындағы «Қаз ҰПУ» командасына бұйырды. Олар 3-ші орын жарыста Қарғалы ауылының командасын қапы қалдырды.
Турнирің «Ең үздік ойыншы» атағына «Қаламгер» командасының ойыншысы Диас Қапжаппаров ие болды. «Ең үздік шабуылшы» болып Нұрлан Ақынбеков танылды. Ал «Ең үздік қақпашы» номинациясы бойынша «Кенен-1» командасының ардагер қақпашысы Мұрат Кененов ие болды.
