Павлодарлық балабақша мұқтаж отбасыларға қайырымдылық шарасын өткізді

3949
Adyrna.kz Telegram

Павлодар қаласының №102 балабақшасының тәрбиешілері мен ата-аналары «Мейрімді жүректер ынтымақтастығы» атты қайрымдылық акциясын өткізді. 

Бала бақша басшысы Сандуғаш Елеусізованың айтуынша, акцияға барлық  тәрбиеленушілердің ата-аналары қатысты.

«Балабақшадағы 12 топтың әрқайсы 40-50 заттан жинап, барлығы 100 келіден астам заттар жиналды. Көбінесе ата-аналар көктемгі киетін аяқ киімді, сонымен қатар мектепке дейінгі балалар мен мектептегі балаларға  арналған ойыншықтар мен киімді және ересектердің киімдерін әкелді», - деді Сандуғаш Қаратайқызы.

Ұйымдастырушылардың айтуынша, іс-шараның мақсаты – көп балалы, мұқтаж отбасыларға және мүмкіндігі шектеулі жандарға көмек көрсету, балаларды адамгершілікке, мейрімділікке баулу. 

Акция ақпанның басында жарияланып, екі аптаға жуық жалғасты. Ата-аналар бірінші күннен бастап, балалардың, ересектердің киімін, ойыншықтарын әкеле бастады. «Тәрбиешілер мен ата-аналар балаларға осы қайрымдылық істің маңыздылығын түсіндіріп, тек қана қажетті сапалы заттарын тіпті ең сүйікті ойыншықтарын да әкеліпті», - дейді Сандуғаш Елеусізова.

Бүгін ата-аналар мен тәрбиешілер барлық жинаған заттарды орталық «Мәшһүр Жүсіп» мешітіне тапсырды. Бұл жердегі имамдар қайрымдылық көмекті мұқтаж отбасыларға, жалғызбасты аналарға, мүмкіндігі шектеулі жандарға таратады.

Айгүл Есенәлиева

Павлодар қаласы

Пікірлер