«АрселорМиттал Теміртау» АҚ шахтасында апат болды

2116
Adyrna.kz Telegram

«АрселорМиттал Теміртау» АҚ шахтасындағы апат орын алды. Бұл туралы «Адырна» тілшісіне Қазақстан Республикасы Төтенше жағдай министрінің баспасөз қызметі хабарлады.

2021 жылғы 13 қаңтарда сағат 21.53-те  «АрселорМиттал Теміртау» АҚ Көмір департаментінің «Ленин атындағы» шахтасында (горизонты 340, тереңдігі 840 метр) барлау ұңғымасын бұрғылау кезінде метан газы мен көмірдің ұсақ фракциялары бөлінді.
Бұл күні үш жұмысшы, атап айтқанда бұрғылау қондырғысының машинисі, машинистің көмекшісі, сондай-ақ желдету және қауіпсіздік техникасы учаскесінің тау-кен шебері ұңғыма түбінде барлау жұмыстарын жүргізіп жатқан.
Апат салдарынан тау-кен шебері мен машинистің көмекшісі апат орнынан дереу кетіп қалды, ал машинист ұңғыма түбінен шыға алмады.

Апат кезінде шахтада үшінші ауысымның 137 қызметкері болған. Олардың 136-сы жер бетіне      шығарылды.
Кәсіпорынның авариялық-құтқару қызметі келгеннен кейін дереу шахтаға түсті. Сағат 23.00-де аэрогазды бақылау аппаратурасының көрсеткіштеріне сәйкес шахтаның тау-кен қазбаларындағы газ жағдайы қалыпқа келді. Авариялық-құтқару қызметінің бөлімшесі ұңғыма түбіндегі тау-кен массасын тазалауда.

Зардап шеккен бір адамды іздестіру жұмыстары жалғастырылуда. Іздестіру жұмыстарына шахтаның 17 қызметкері мен авариялық-құтқару қызметінің екі бөлімшесі (16 адам) жұмылдырылды.
Аталған апатты тексеру үшін ҚР ТЖМ Өнеркәсіптік қауіпсіздік комитетінің Қарағанды облысы бойынша департаментінің жанында комиссия құрылды.

"Адырна" ұлттық порталы

Фото ашық дереккөзден алынды

Пікірлер