Фото: Lukasz Glowala/File Photo/REUTERS
5 қазанға қараған түні Польша мен НАТО елдерінің әскери-әуе күштері жоғары дайындық режиміне көшті. Бұл шешім Ресей Федерациясының Украинаға бағытталған ауқымды әуе шабуылына байланысты қабылданды. Аталған ақпаратты Польша Қарулы күштерінің Оперативтік қолбасшылығы X әлеуметтік желісінде жариялаған, деп хабарлайды “Адырна”.
Мәліметтерге сәйкес, Ресей 4-нен 5 қазанға қараған түні Украина аумағындағы бірқатар нысандарға зымыран соққыларын жасаған. Бұған жауап ретінде Польша өз әуе кеңістігінің қауіпсіздігін қамтамасыз ету мақсатында барлық қажетті қауіпсіздік рәсімдерін енгізгенін хабарлады.
Оперативтік қолбасшылықтың мәлімдеуінше, Польша мен одақтас НАТО елдерінің әскери ұшақтары әуе кеңістігінде белсенді әрекет етуде. Сонымен қатар, жерүсті әуе шабуылына қарсы қорғаныс жүйелері мен радиолокациялық бақылау құрылғылары жоғары жауынгерлік дайындық деңгейіне келтірілген.
Польша тарапы бұл әрекеттердің алдын алу сипатында екенін және ең алдымен әуе кеңістігінің қауіпсіздігі мен шекаралас аумақтардағы тұрғындардың қорғалуына бағытталғанын баса айтты.
«Біз қазіргі жағдайды мұқият бақылап отырмыз. Барлық күштер мен құралдар жедел әрекет етуге дайын», – делінген Оперативтік қолбасшылық хабарламасында.
Украина Қарулы күштерінің мәліметінше, 5 қазан күні таңғы 03:34-те Қара теңіз акваториясынан "Калибр" типіндегі қанатты зымырандардың ұшыруы тіркелген. Бұл Ресейдегі Ту-95 бомбалаушы ұшақтарының әуеге көтерілуінен кейін орын алған. Аталған оқиғалар жаңа зымыран шабуылының белгісі болуы мүмкін екені айтылды.
Ресей мен Украина арасындағы қақтығыстың ушығуы Еуропа елдерінің қауіпсіздігіне тікелей әсер етуде. Польша мен НАТО елдерінің жедел әрекеті аймақтағы шиеленіс деңгейінің жоғары екендігін көрсетіп отыр. Ал Украина тарапы жаңа шабуылдарға қарсы қорғаныс шараларын күшейту үстінде.
