Қытайда Agibot компаниясы әзірлеген A2 гуманоидты роботы үздіксіз 106,286 шақырым жол жүріп, Гиннес рекордтар кітабына енді, деп хабарлайды "Адырна" ұлттық порталы Chinadaily-ға сілтеп.
Робот 10 қараша түнде Сучжоу қаласынан жолға шығып, 13 қарашаның таңында Шанхайдағы Бунд жағалауына жетті. A2-нің үздіксіз қозғалуына қуат элементтерін жылдам алмастыру жүйесі мүмкіндік берген.
Agibot вице-президенті Ван Чуане роботтың көрсеткішін жоғары бағалап, оның аппараттық бөлігі мен тепе-теңдік алгоритмдерінің жетілгенін атап өтті.
«Сучжоу мен Шанхай арасын жаяу жүріп өту көптеген адамдар үшін қиын. Роботтың мұны еңсеруі оның төзімділігін дәлелдейді және кең көлемдегі коммерциялық қолдануға негіз болады», - деді ол.
A2 роботы бағдаршамдар, тар өткелдер, көпшілік жүретін тротуарлар сияқты күрделі жағдайларда да сенімді навигация көрсете алған. Робот асфальт, плиталы жолдар, көпірлер, пандустар арқылы жүріп, жол қозғалысы ережелерін сақтаған.
