АҚШ Мемлекеттік департаменті Түркияға өз қорындағы 70 M39 ATACMS жедел-тактикалық зымыранын Украинаға беруіне рұқсат беруді жоспарлап отыр. Бұл туралы АҚШ Конгресіне ресми хабарлама жолданған, деп жазады "Адырна".
6 тамызда Congressional Record басылымында жарияланған құжатта Украинаға берілетін әскери техника мен оқ-дәрілердің тізімі көрсетілген.
Жеткізілімдер пакетіне:
- 70 M39 ATACMS зымыраны;
- 12 M270 MLRS реактивті залппен оқ ату жүйесі;
- кассеталық оқтұмсықтары бар шамамен 2,5 мың M26 зымыраны;
- 47 мың артиллериялық снаряд кіреді.
АҚШ Мемлекеттік департаментінің мәліметінше, аталған қару-жарақ Украинаға қайтарымсыз негізде беріледі.
Келісімді ұйымдастыру жұмыстарына Түркияның MKE A.S., ASFAT және ARCA Savunma компаниялары, Болгарияның VTIC International Ltd., сондай-ақ АҚШ-тың Pansophico және Patriot Defense Groupкомпаниялары қатысады.
Құжатта қару-жарақты Украинаға жеткізудің нақты мерзімі көрсетілмеген. Сондай-ақ бұл хабарлама АҚШ-тың Түркияға қаруды беруіне рұқсат беру ниетін білдіреді, яғни жеткізілімнің жүзеге асқаны туралы ақпарат емес.
