АҚШ президенті марқұм сенатор Линдси Грэм ұсынған заңда көзделген санкция мен баж салығын қолдануды тоқтату туралы жарлыққа қол қойды, деп хабарлайды “Адырна”.
РБК-Украина дерегінше, аталған заң Ресейдің Украинаға қарсы соғысына байланысты Мәскеуге қысымды күшейтуді көздеген. Құжатта, атап айтқанда, Ресейдің энергетикалық ресурстарын сатып алатын елдерге баж салығын енгізу қарастырылған.
Трамп жарлығында бұл шараларды қазіргі уақытта қолданбау АҚШ-тың ұлттық мүддесіне сай келетінін Конгреске жеткізгенін хабарлаған. Құжат баж салығын енгізу мүмкіндігін сақтай отырып, оның қолданылуын уақытша тоқтатады. Яғни, АҚШ президенті қажет деп тапса, бұл шараларды кейін қайта іске қоса алады.
Заң жобасы Ақ үй басшысына Ресей мұнайын ең көп сатып алатын бес елдің тауарларына 100 пайыздық баж салығын енгізу үшін 30 күн мерзім берген. Сонымен қатар, Ресейдің бірқатар кәсіпорнына санкция салу және АҚШ-қа импортталатын Ресейдің энергетикалық өнімдеріне 500 пайыздық баж салығын енгізу көзделген. Белгіленген мерзім 18 қазанда аяқталуы тиіс еді.
АҚШ бұқаралық ақпарат құралдарының хабарлауынша, баж салығын қолдануды тоқтату Конгрестегі, соның ішінде Республикалық партия өкілдерінің арасында сын тудыруы мүмкін. Олардың бір бөлігі Трамптың Ресей дизель отынын әлемдік нарыққа жеткізуге мүмкіндік берген шешіміне наразы.
Осы аптада екі партияның сенаторлары Трамптан Ресей президенті Владимир Путинмен жасалған дизель отынына қатысты келісімді тоқтатуды және Грэм заңындағы талаптардың орындалуын қамтамасыз етуді сұрап, хат жолдаған.
Санкциялар мен баж салығын уақытша тоқтату АҚШ-тың Ресей энергетикалық ресурстарын ірі көлемде сатып алатын Қытай, Үндістан және Түркиямен ықтимал келіспеушіліктерінің алдын алуға да мүмкіндік береді.
