Мемлекет басшысы құрған комиссия Қазақстан Республикасы Қорғаныс министрлігінің қызметін кешенді тексерудің аралық қорытындыларын ұсынды.
Тексеру қорғаныс ведомствосының 104 нысанын қамтыды. Бюджет қаражатын пайдалану тиімділігіне аудит жүргізу жалғасуда.
Комиссия жұмысы аясында қауіпсіздікті қамтамасыз етуге, әскери қызмет өткеруге тиісті жағдай жасауға, азық-түлікпен және киім-кешекпен жабдықтаудың, медициналық көмек көрсетудің сапасына, сондай-ақ мемлекеттік мүліктің сақталуына баса назар аударылып отыр.
Анықталған жекелеген құқық бұзушылық деректері бойынша сотқа дейінгі тергеп-тексеру басталды.
Қазіргі уақытта қылмыстық қудалау органдарының қарауында 37 іс бар. Тергеу мүддесіне байланысты бұл істер жөніндегі мәліметтер әзірге жария етілмейді.
Тексеру «Заң және тәртіп» қағидаты негізінде жүргізілуде. Оның мақсаты – Қарулы Күштердің жауынгерлік әзірлігін қамтамасыз ету және әскери тәртіпті нығайту үшін жүйелі шаралар әзірлеу.
Комиссияның ұсынымдары Әскери реформа жоспарын іске асыру барысында да пайдаланылып отыр.
Комиссия жұмысы биылғы қарашада аяқталады.
Еске салайық, 24 қыркүйекте Маңғыстау облысында әскери-теңіз оқу-жаттығуы кезінде қайғылы оқиға болған. Жағалауда оқу-жауынгерлік тапсырмаларды орындау барысында ауа райы күрт бұзылып, жел күшейген. Соның салдарынан теңізде 17 әскери қызметші қалып қойған. Олардың үшеуі құтқарылып, 14-і қаза тапты.
Оқиғадан кейін Мемлекет басшысы Қасым-Жомарт Тоқаев қорғаныс министрлігіне кешенді тексеру жүргізуді тапсырды. Президент әскердегі жүйелі мәселелерге назар аударып, әскери қызметшілердің қаза болуын офицерлердің, соның ішінде генералдардың кәсіби міндеттерін тиісінше орындамауымен байланыстырды. 21 қазанда Қауіпсіздік Кеңесінің отырысында әскери реформаның жоспары мақұлданды. Ал 24 қазанда қорғаныс министрлігі реформаны іске асыру жұмыстары басталғанын хабарлады.
