Ұлыбритания билігі Әскери-теңіз күштерінің ұшқышсыз суүсті аппараттарына орнатылған камералар Қытайдағы IP-мекенжайға техникалық ақпарат жібергенін анықтады. Бұл туралы The Telegraph басылымы жазды, деп хабарлайды "Адырна".
Мәселе британдық қорғаныс мердігері Kraken Technology Group компаниясы жеткізген K3 Scout ұшқышсыз аппараттарына қатысты болып отыр. Аппараттарға орнатылған камералар үшінші тарап компаниясынан сатып алынған. Аталған компания бұған дейін жабдықтардың қауіпсіздігіне кепілдік берген.
Тексеру барысында камералардың құрамынан Қытайда өндірілген компоненттер анықталған. Кейінгі зерттеу құрылғылардың Қытайдағы IP-мекенжайға жүйенің жұмыс жағдайы туралы техникалық деректерді жібергенін көрсетті.
Атап айтқанда, камералар жабдықтың желіге қосылғаны және оның жұмыс істеп тұрғаны туралы «жүйе күйінің сигналдарын» жолдаған.
Оқиға анықталғаннан кейін Ұлыбританияның Қорғаныс министрлігі аталған ұшқышсыз аппараттарды интернеттен ажыратқан.
Дегенмен британдық ведомство өкілінің айтуынша, жүргізілген тергеу барысында сезімтал немесе аса маңызды ақпараттың шетелге таралғанын көрсететін ешқандай белгі анықталмаған.
Британ тарапы қазіргі таңда оқиғаның қауіпсіздікке ықтимал әсерін бағалап, жабдықтардың жұмыс істеу тәртібін қайта қарастырып жатыр.
