رەسەي مەن قىتاي ستراتەگيالىق بومبالاۋشى ۇشاقتارىن ۇشىردى

2101
Adyrna.kz Telegram
فوتو: cdn.profile.ru
فوتو: cdn.profile.ru

اق ءۇيدىڭ مالىمەتىنشە، رەسەي شىعىس جانە وڭتۇستىك قىتاي تەڭىزدەرىندەگى كورشىلەرىمەن بولعان اۋماقتىق داۋلاردا قىتايدى قولدايتىن بولادى، دەپ حابارلايدى "ادىرنا" ۇلتتىق پورتالى "golosameriki.com" سايتىنا سىلتەمە جاساپ.

"رەسەي مەن قىتاي ستراتەگيالىق بومبالاۋشى ۇشاقتارىنىڭ شىعىس ازياعا بىرلەسكەن رەيسى ەكى ەلدىڭ بايلانىستارىنىڭ قانشالىقتى جاقىن ەكەنىن كورسەتەدى", — دەدى اقش اكىمشىلىگىنىڭ جوعارى لاۋازىمدى قىزمەتكەرى.

Reuters اگەنتتىگىنىڭ حابارلاۋىنشا، رەسەي قورعانىس مينيسترلىگى جاپونيا مەن شىعىس قىتاي تەڭىزدەرىندە قىتايمەن بىرگە 13 ساعات بويى جاساعان اسپان پاترۋلدىكتەرىن راستادى. پاترۋلگە رەسەيلىك ستراتەگيالىق بومبالاۋشى تۋ-95 جانە قىتايدىڭ Xian ن-6 ۇشاعى قاتىستى. جاپون جانە وڭتۇستىك كورەيا اۋە كۇشتەرىنىڭ ۇشاقتارى ۇشۋدىڭ ءبىر بولىگىندە ولاردىڭ سوڭىنان ەردى.

رەسەي مەن قىتاي ستراتەگيالىق اۆياتسياسىنىڭ بىرلەسكەن مۇمكىندىكتەرىن كورسەتۋ اقش پرەزيدەنتى دجو بايدەننىڭ ايماققا ساپارىمەن تۇسپا-تۇس كەلدى. سەيسەنبى كۇنى ول توكيودا «تورتجاقتى قاۋىپسىزدىك ديالوگى» اياسىندا جاپونيا، اۆستراليا جانە ءۇندىستان باسشىلارىمەن كەزدەستى، ونىڭ ماقساتتارىنىڭ ءبىرى قىتايدىڭ ايماقتاعى ءوسىپ كەلە جاتقان ىقپالىنا قارسى تۇرۋ بولدى.

ەسكە سالايىق، بۇل بايدەننىڭ پرەزيدەنت رەتىندە ازياعا جاساعان العاشقى ساپارى بولاتىن. پرەزيدەنت وڭتۇستىك كورەيا مەن جاپونيادا بولدى. ساپار بارىسىندا اق ءۇي باسشىسى اقش ءوزىنىڭ وداقتاستارىمەن جانە سەرىكتەستەرىمەن بىرگە ەركىن جانە اشىق ءۇندى-تىنىق مۇحيتى ايماعىن قۇرۋعا ۇمتىلۋعا نيەتتى ەكەنىن ايتتى.

قىتاي مەن رەسەي بۇعان دەيىن ستراتەگيالىق بومبالاۋشى ۇشاقتاردىڭ بىرلەسكەن جاتتىعۋلارىن وتكىزگەن بولاتىن، بىراق سەيسەنبى كۇنگى رەيس رەسەيدىڭ 24 اقپاندا ۋكرايناعا باسىپ كىرۋىنەن كەيىنگى العاشقى رەيس بولدى.

"بۇل قىتايدىڭ ءالى دە رەسەيمەن، سونىڭ ىشىندە اسكەري سالادا تىعىز جۇمىس ىستەۋگە دايىن ەكەنىن بىلدىرەدى، - دەپ ءتۇسىندىردى اقش رەسمي وكىلى. — قىتاي رەسەيدەن الشاق جاتقان جوق. كەرىسىنشە، بۇل جاتتىعۋلار قىتايدىڭ رەسەيدىڭ باتىستا سوعىسىپ جاتقاندا شىعىستا ءوزىن قورعاۋعا كومەكتەسۋگە دايىن ەكەنىن كورسەتەدى".

 

  "ادىرنا" ۇلتتىق پورتالى

پىكىرلەر