فوتو: Threads @erzhan_kalymbai
Threads الەۋمەتتىك جەلىسىندە ارقاسىنا كۋرەرلىك تەرموسومكە اسىنىپ، قولىنا ءسابيىن كوتەرىپ جۇرگەن ايەلدىڭ سۋرەتى كەڭىنەن تارالىپ جاتىر. جەلى قولدانۋشىلارىنىڭ ايتۋىنشا، ايەل جاياۋ كۋرەر بولىپ جۇمىس ىستەيدى.
جاريالانىم اۆتورى ايەلدىڭ جەكە باسى ازىرگە انىقتالماعانىن ايتىپ، وعان قولداۋ كورسەتۋ ءۇشىن بايلانىس ورناتۋعا كومەكتەسۋدى سۇراعان. وسىدان كەيىن جازبا الەۋمەتتىك جەلىدە قىزۋ تالقىلانىپ، مىڭداعان قولدانۋشىنىڭ نازارىن اۋداردى.
فوتودا ارقاسىنا جەتكىزۋ سومكەسىن اسىنعان ايەلدىڭ قولىندا نارەستە ۇستاپ تۇرعانى كورىنەدى. بۇل كورىنىس كوپشىلىكتىڭ جۇرەگىنە اسەر ەتىپ، ءتۇرلى پىكىرلەردىڭ تۋىنداۋىنا سەبەپ بولدى.
جەلى قولدانۋشىلارى ايەل مەن ونىڭ بالاسىنا كومەكتەسۋگە دايىن ەكەندەرىن بىلدىرۋدە. ءبىرى قارجىلاي كومەك كورسەتۋدى ۇسىنسا، ەندى ءبىرى ازىق-تۇلىك، بالالار كيىمى مەن قاجەتتى زاتتاردى بەرۋگە نيەتتى ەكەنىن جازعان. سونداي-اق ايەلدى تانيتىن ادامدار بولسا، حابارلاسۋىن سۇراعاندار دا كوپ.
تالقىلاۋ بارىسىندا قولدانۋشىلار ايەلدىڭ وتباسىلىق جاعدايىنا قاتىستى سۇراقتار كوتەرىپ، ونىڭ نە سەبەپتى ءسابيىن قۇشاعىنا الىپ جۇمىس ىستەۋگە ءماجبۇر بولعانىن بىلگىسى كەلەتىندەرىن جەتكىزدى.
قازىرگى ۋاقىتتا ايەلدىڭ كىم ەكەنى رەسمي تۇردە انىقتالعان جوق. سوعان قاراماستان، الەۋمەتتىك جەلى قولدانۋشىلارى وعان قولداۋ كورسەتۋ ماقساتىندا جازبانى ءبولىسۋدى جالعاستىرىپ جاتىر.
