رۋح ءمۇسىنى

3815
Adyrna.kz Telegram
كوزى ۇشىندا سالۋالى، بايسالدى كوش نايقالىپ،
بولمىسىنان ءسوز بۇرلەپ، سامايىنان وي تامىپ.
وتىر توردە قازاقتىڭ رۋحىن ارتقان العاداي،
ءوتۋ قانداي مارتەبە قازاقپىن دەپ ايتا الىپ!
قاباعىندا سۋىق سۇس، كوزدەرىندە الىپ كەك،
وتىر توردە ھاس ۇزان شۇعىلالى جارىق بوپ.
ءار سوزىنە قاراۋىل قويىپ سويلەر ءدىلۋار،
ايتسا اقاڭدى جاراسار ءبىر ءوزىن – ءبىر حالىق دەپ.
كۇيى جۇپار بويلاۋىق سارىارقانىڭ سامالى،
ءانى جۋسان بۇرقىراپ، قوم سۋلارداي قوعالى،
كەۋدەسى – ۇلى ساحارا ۇستىندەگى كۇمبەزدەر،
يىقتارى – ءور تاۋلار، حان كەنەنىڭ قامالى.
ۋاقىت – ونىڭ ىشىندە،
دالا – ونىڭ جادىندا،
نامىسى – الماس كوك سۇڭگى نايزاسىنىڭ سابىندا!
كوكتە كۇنگە،
جەردە ەلگە
قانباي وتكەن مەيىرى،
ءبىر كوش توقتاپ تۇرعانداي يماناقتىڭ ماڭىندا...
كەڭىستىككە سۇيەگەن الىپ باسى – الىپ ءتور،
الىپ ءتوردىڭ الدىنا الاسارماي بارىپ كور.
اقاڭ سۇرگەن داۋرەندى
سۇرە الساڭ ەر ءسۇرىپ كور،
اقاڭ سالعان "داۋرەن-اي"
شاماڭ جەتسە سالىپ كور!
وتىرىسى – ءبىر ءداۋىر،
وتىرىسى – ءبىر عالام،
ەڭكەيمەگەن،
شوكپەگەن،
مۇقالماعان،
سىنباعان،
وتىر ۇلتتىڭ ۇستىنى تەرەڭ ويدىڭ قويىنىندا،
شيىر-شيىر ءاجىمى – قازاق وتكەن شىرعالاڭ.
وتىر اردىڭ ايناسى،
وتىر رۋحتىڭ ءمۇسىنى،
ويى ءزىل دە ءسوزى ءمىر،
ءىزى تۋرا،
ءىسى ءىرى.
وتىر ابىز،
كەمەڭگەر،
وتىر باتىر،
قامشىگەر،
جەپ قويارداي مىسىمەن قاراپايىم كىسىنى.
سوزدەرىنىڭ ءسانى ويۋ مانگە قانىق ءار ورنەك،
جان – ماڭگىلىك،
ءدىل – ازات،
ولسە عاپىل ءتان ولمەك...
ءسوز العالى وتىر ول شىعۋ ءۇشىن مىنبەرگە،
بار ادامزات قازاقتان تارايتىنىن دالەلدەپ!
ميراس اسان،
"ادىرنا" ۇلتتىق پورتالى
پىكىرلەر