ەلوردادان جەزقازعانعا تالگو پويىزدارى قاتىناي باستادى، دەپ جازادى "ادىرنا" ۇلتتىق پورتالى. بۇل تۋرالى قازاقستان تەمىر جولى ءباسپاسوز قىزمەتى حابارلادى.
"نۇر-سۇلتان – جەزقازعان" باعىتىنداعى №65/66 العاشقى جولاۋشىلار پويىزى ۇلىتاۋ وبلىسىنا كەلدى. تالگو ۆاگوندارىنان تۇراتىن قۇرام نۇر-سۇلتاننان جۇپ كۇندەرى، جەزقازعاننان تاق كۇندەرى قاتىنايتىن بولادى. بۇعان دەيىن، وسى جىلدىڭ 5 قىركۇيەگىندە "الماتى-2 - جەزقازعان" قاتىناسىنداعى №73/74 پويىزى ىسكە قوسىلعان بولاتىن", - دەلىنگەن رەسمي حابارلامادا.
"جولاۋشىلار تاسىمالى" اق باس ديرەكتورى جانىبەك تايجانوۆتىڭ ايتۋىنشا، اتالعان پويىزداردى ىسكە قوسۋ قازاقستاننىڭ مەگاپوليستەرىمەن جاڭا ءوڭىردىڭ كولىكتىك قولجەتىمدىلىگىن جاقسارتۋعا مۇمكىندىك بەرەدى.
"ەلوردادان كەلگەن جاڭا پويىز بارلىق زاماناۋي تالاپتارعا ساي جانە قاجەتتى جابدىقتارمەن، سونىڭ ىشىندە اۋا باپتاۋ جۇيەسىمەن جانە بيواجەتحانامەن جابدىقتالعان. جول ءجۇرۋ كەزىندە جولاۋشىلارعا فيلمدەر كورىپ، مۋزىكا تىڭداۋ ءۇشىن "Vputi.kz" مۋلتيمەديالىق پورتالعا كىرۋ مۇمكىندىگى بەرىلەدى. گراند كلاستى ۆاگونداردىڭ جولاۋشىلارى دۋش كابينالارىن قولدانا الادى", - دەلىنگەن حابارلامادا.
"ادىرنا" ۇلتتىق پورتالى
