«قار قىزىنىڭ» مولدىرلىگى ساقتالدى ما؟

1133

سوڭعى كۇندەرى الماتىعا جاۋماي جاتىپ ەرىپ جاتقان عۇمىرى قىسقا اق قاردان تۇرعىنداردىڭ شارشاعانى راس. ادام بالاسى قاشاندا كىرشىكسىز ءمولدىر پاك دۇنيەنى اڭسايدى ەمەس پە؟! سوعان ءدوپ كەلگەن بولۋ كەرەك مۇحتار اۋەزوۆ اتىنداعى دراما تەاتردا ورالحان بوكەيدىڭ «قار قىزى» كورەرمەن قاۋىمعا ىستىق ىقىلاسپەن جول تارتتى. بۇل سپەكتاكلدىڭ پرەمەراسىنا قۇشتار بوپ جۇرگەن حالىقتىڭ قاراسى راسىمەن كوپ ەكەن. اسىرەسە الەمنىڭ اينەگىن قىراۋ باسقان تۇتاستاي سۋىق دۇنيەدە ناركەس قار قىزىن اڭساعان ەر-ازاماتتاردىڭ جاندارىنا دەمەۋ بولدى ما دەپ تە ويلانىپ قالاسىڭ...

ءۇش بىردەي اتپالداي ازاماتتاردىڭ قالىڭ قاردى كەشىپ ءجۇرىپ، قوڭقاي زالىمگە جانە ايىرتاۋدا وتىرعان سيىرشى شالعا تاپ بولعانىن ۇتىمدى بەينەلەگەن قويىلىمدى بىرىڭعاي ۇرەي سەزىمىن كەشىپ وتىرىپ كوردىك. ال قويىلىمعا زيالى قاۋىم وكىلدەرىنىڭ پىكىرى قانداي ەكەن، بىرگە وقيىق.

زەينەپ احمەتوۆا، ەتنوگراف، جازۋشى:

مەن بۇگىن ماعجان تۇرىس وينايدى دەگەندى ەستىپ قويىلىمعا ىنتىزار بوپ كەلگەن ەدىم. جالپى سپەكتاكل ۇنادى. ءبىز قانشا ايتقانمەن بۇرىنعى ناعىز كلاسسيك ارتىستەردى كورگەن بۋىنبىز عوي. ىشتەي سالىستىرىپ وتىردىم.  سال ءبىر جاداۋ كوڭىلگە جاماۋ بولا الماعانى ايقاي-شۋ كوپ ەكەن. ايقايلاساق جاقسى ەستىلەدى دەپ ويلايتىن بولۋ كەرەك... ۇنسىزدىكپەن دە قويىلىم ءماندى شىعادى ەمەس پە؟! دەگەنمەنەن ءبارىبىر قويىلىم جاقسى ويلاستىرىلعان، جاستارعا ونەرلەرىڭ ورگە ءجۇزسىن دەيمىن!

ءسابيت ابدىحالىقوۆ، اكتەر، قازاقستاننىڭ ەڭبەك سىڭىرگەن قايراتكەرى:

قارا ءسوزدىڭ پاتشاسى عوي ورالحان بوكەي. بۇل جەردە تەاتردا ءتىل جوعالىپ كەتتى دەگەن سىندار بولىپ جاتادى. قازاقتىڭ تىلىنە، ءسوز مايەگىنە ءمان بەرىلگەن، ناعىز اكتەرلىك سپەكتاكل بولدى.

بالتابەك نۇرعاليەۆ، اقىن، رەجيسسەر:

قويىلىم ۇنادى دەپ ايتا الامىن. دەگەنمەن بۇل ءسوزدى ادامدىققا سالىپ قانا ايتىپ تۇرمىن. بىراق ادامگەرشىلىك-ماماندىق ەمەس. كاسىبي تۇرعىدان تالدايتىن بولسام، ودىرايعان ولقىلىقتاردى كورىپ تۇرمىن. بۇل مەتافورالىق-پوەتيكالىق سپەكتاكل بولعاندىقتان قارا سوزبەن جازىلعانمەندە، ورالحان بوكەيحاننىڭ تىلىندەي ءمولدىر، ءيىرىمدى، اعىپ جاتقان بۇلاقتاي بولمادى. قار سەكىلدى اپپاق ءارى انىق بولۋى كەرەك ەدى. ساحنا تىلىنەن  ءماتىننىڭ ءمانىن ۇعىپ، پوەتيكالىق قۋاتتى سەزىنبەدى. مۋزىكا، ستسەنوگرافيا، دەكوراتسيا جاعىنان ارينە ءسوز جوق!ايتكەنمەن تۇنىعىمىزدى لايلادى...

 

ءيا، تاياقتىڭ ەكى ۇشى بولاتىنى بەلگىلى. سوندىقتان جوعارىدا ايتىلعان تىرناقتاي عانا سىندى اكەمتەاترى كوتەرە الاتىنى داۋسىز. دەگەنمەن كورەرمەن پىكىرى قاشاندا ماڭىزدى ەمەس پە؟! ونەرسۇيەر قاۋىمنىڭ تىكەسىنەن تىك تۇرىپ، جارتى ساعاتتاپ قول سوققانىنا قاراپ قويىلىمعا "5" دەگەن باعا بەرسەك ارتىق ەمەس-اۋ، ءسىرا؟!

(سۋرەتتەر kazgazeta.kz سايتىنان الىندى.

سۋرەتتەردى تۇسىرگەن دوسجان بالابەكۇلى)

اقگۇل ايداربەكقىزى،

«ادىرنا» ۇلتتىق پورتالى

پىكىرلەر