ايسۇلتان نازارباەۆ "ومىرىنە قاۋىپ تونگەنىن" ايتادى. جاقىندارى ءۇنسىز

4315
Adyrna.kz Telegram
قازاقستاننىڭ بۇرىنعى پرەزيدەنتى نۇرسۇلتان نازارباەۆتىڭ جيەنى ايسۇلتان نازارباەۆ.

قازاقستاننىڭ ەكس-پرەزيدەنتى نۇرسۇلتان نازارباەۆتىڭ جيەنى، سەنات سپيكەرى داريعا نازارباەۆانىڭ ۇلى ايسۇلتان نازارباەۆ ومىرىنە قاۋىپ ءتونىپ تۇرعانىن ايتىپ قالدى. ول Facebook پاراقشاسىنداعى بىرنەشە جازباسىندا جانە اقپارات قۇرالدارىنا بەرگەن سۇحباتىندا "قاۋىپ ءوز وتباسىنان" ەكەنىن مالىمدەدى.

ايسۇلتاننىڭ (بىلتىر لوندون سوتى پوليتسياعا شابۋىلدادى دەپ شارتتى جازا كەسىپ، ەسىرتكىگە تاۋەلدىلىكتەن ەمدەۋگە جىبەرگەن) جازبالارى مەن ايتقاندارىنا نازارباەۆ اۋلەتى ازىرگە ەشقانداي پىكىر بىلدىرگەن جوق.

23 قاڭتاردا ازاتتىق ءتىلشىسى سەنات وتىرىسىنان شىققان داريعا نازارباەۆاعا ۇلىنىڭ سوزىنە قاتىستى پىكىر الۋعا تىرىسقانىمەن، ناتيجە شىقپادى. پارلامەنتتە كۇزەت كۇشەيدى. بۇرىن نازارباەۆانى ەكى ادام كۇزەتەتىن ەدى، بۇل جولى ونىڭ جانىندا كەم دەگەندە التى كۇزەتشى ءجۇردى. كۇزەتشىلەردىڭ ءبىرى ءتىلشىنىڭ قولىن قايىرىپ، اۋزىن جاپتى. كەدەرگىگە قاراماستان ازاتتىق ءتىلشىسى داريعا نازارباەۆادان "ۇلىنىڭ ومىرىنە قانداي قاۋىپ ءتونىپ تۇرعانىن" سۇراپ ۇلگەردى. بىراق نازارباەۆا ءتىلشى سۇراعىن جاۋاپسىز قالدىردى.

22 قاڭتاردا ايسۇلتان نازارباەۆ ۇزاق ۇزىلىستەن كەيىن Facebook پاراقشاسىندا بىرنەشە پوست جاريالادى. وندا ول "تۇرمەدە وتىرىپ شىققانىن", "جاقىندارىمەن كوپ ماسەلە بولعانىن" جازدى. ايسۇلتان پوستىندا قازىر لوندونداعى Priory Hospital Hayes Grove كلينيكاسىندا (18 قازاندا اعىلشىن سوتى ايسۇلتاندى ەسىرتكىگە تاۋەلدىلىكتەن ەمدەلۋگە مىندەتتەگەن) جاتقانىن دا ايتتى. ول جازباسىندا تەلەفون نومەرىن قالدىرىپ (ازاتتىق بۇل نومەرگە حابارلاسقانىمەن جاۋاپ بولمادى), جۋرناليستەر سۇراعىنا جاۋاپ بەرۋگە دايىن ەكەنىن ايتقان. جازۋىنشا، ومىرىنە قاۋىپ ءتونىپ تۇر جانە ونى بىرەۋلەر ولتىرگىسى كەلەدى. ايسۇلتان ۇلىبريتانيا حانشايىمىنان نۇرسۇلتان نازارباەۆقا حابارلاسۋدى دا سۇراعان.

ايسۇلتان Facebook پاراقشاسىندا"مەنىڭ شەشەم اتامدى قارماقتا ۇستاپ وتىر. سەبەبى ول مەنىڭ اكەم" ("مويا مات دەرجالا دەدا نا كريۋكە يز زا توگو چتو يا ەگو سىن") دەپ جازدى.

جەلى قولدانۋشىلارىنىڭ اراسىنان ايسۇلتاننىڭ پاراقشاسىن بىرەۋلەر بۇزىپ كىرگەن دەگەندەر دە تابىلدى. كەيىن قازاقستاندىق جۋرناليستەر ايسۇلتان نازارباەۆقا حابارلاسىپ، سۇحبات العان. ايسۇلتان Facebook پاراقشاسىنا ءوزى جازىپ وتىرعانىن ايتتى. ۆيدەودا ونىڭ Priory كلينيكاسىندا وتىرعانى بايقالادى.

ازاتتىق بريتانيالىق كلينيكاعا حابارلاستى. اۋرۋحانا پاتسيەنتتەرى جايلى اقپارات بەرمەيتىنىن، ەمدەلۋشىلەر تۋرالى دەرەكتەر جەكە باس قۇپياسى ەكەنىن ايتتى.

نۇرسۇلتان نازارباەۆ (پرەزيدەنت بولىپ تۇرعان كەز) ايەلى سارا نازارباەۆا جانە جيەنى ايسۇلتانمەن بىرگە ويىن-ساۋىق ورتالىعىنىڭ اشىلۋىندا تۇر. الماتى، 1997 جىل. سۋرەت اقوردانىڭ Instagram-داعى پاراقشاسىنان الىنعان
نۇرسۇلتان نازارباەۆ (پرەزيدەنت بولىپ تۇرعان كەز) ايەلى سارا نازارباەۆا جانە جيەنى ايسۇلتانمەن بىرگە ويىن-ساۋىق ورتالىعىنىڭ اشىلۋىندا تۇر. الماتى، 1997 جىل. سۋرەت اقوردانىڭ Instagram-داعى پاراقشاسىنان الىنعان

23 قاڭتاردا ايسۇلتان نازارباەۆ تاعى دا جۇمباقتاعان پوست جاريالاپ، "الەمدى جاۋلاپ العان سيقىر جايلى" جازدى. ودان كەيىن مۇحتار ءابليازوۆتىڭ (10 جىل بويى شەتەلدە تۇرىپ جاتقان ەكس-بانكير، نازارباەۆ پەن قازاقستان بيلىگىن سىناپ جۇرگەن وپپوزيتسيالىق ساياساتكەر. نۇر-سۇلتان ونى بىرنەشە قىلمىسقا ايىپتاپ، ەلگە ەكستراديتسيالاۋعا تالپىنىپ كەلەدى. ءابليازوۆ ايىپتاردىڭ ساياسي استارى بار دەپ سانايدى) حابارلاسۋىن سۇراپ، تاعى ءبىر پوست جاريالادى. بىرنەشە ساعاتتان سوڭ ءابليازوۆ Facebook جەلىسىندە تىكەلەي ەفيرگە شىعىپ، ايسۇلتانمەن سويلەسكەنىن، وعان شەشەسى تاراپىنان قاۋىپ ءتونىپ تۇرعانىن ايتتى.

"ونىڭ ومىرىنە قاۋىپ ءتونىپ تۇر. ول ءوزىن راحات اليەۆ سياقتى ءولتىرىپ تاستاي ما دەپ قاۋىپتەنەدى" دەدى ءابليازوۆ.

راحات اليەۆ – داريعا نازارباەۆانىڭ بۇرىنعى كۇيەۋى، ديپلوماتيالىق قىزمەتتەردە ىستەگەن. 2007 جىلى قۋعانعا ۇشىراپ، 2015 جىلى اقپاندا ۆەنا تۇرمەسىندە ءولى كۇيىندە تابىلدى. رەسمي تەرگەۋ ول سۋيتسيد جاساعان دەگەن شەشىمگە كەلگەن. ال اليەۆتىڭ ەكىنشى ايەلى ەلنارا شورازوۆانىڭ ادۆوكاتتارى گەرمانيالىق ەكسپەرتتەرگە سىلتەپ، اليەۆتى ءولتىرىپ كەتتى دەگەن.

داريعا نازارباەۆا سەنات وتىرىسىندا. نۇر-سۇلتان، 23 قاڭتار 2020 جىل.
داريعا نازارباەۆا سەنات وتىرىسىندا. نۇر-سۇلتان، 23 قاڭتار 2020 جىل.

ازاتتىق ايسۇلتان نازارباەۆقا "تونگەن قاۋىپ جايلى" قازاقستاننىڭ ۇلىبريتانياداعى ەلشىلىگىنەن كوممەنتاري الا المادى. تەلەفون تۇتقاسىن كوتەرگەن ەلشىلىك قىزمەتكەرى قانداي دا ءبىر اقپارات بەرۋگە وكىلەتى جوعىن ايتتى. ول ءتىلشى سۇراعىن اقپارات قۇرالدارىمەن بايلانىسقا جاۋاپتى قىزمەتكەرگە جەتكىزەتىنىن ايتىپ، رەداكتسيا نومەرىن جازىپ الدى. بىراق ەلشىلىك تاراپىنان رەداكتسياعا ەشكىم حابارلاسپادى.

قازاقستاننىڭ ەكس-پرەزيدەنتى نۇرسۇلتان نازارباەۆتىڭ اكىمشىلىگىنە حابارلاسۋ مۇمكىن بولمادى. كانتسەلياريانىڭ ءباسپاسوز حاتشىسى ايدوس ۇكىباەۆ تەلەفونعا جاۋاپ بەرمەدى.

نۇرسۇلتان نازارباەۆ 2019 جىلى ناۋرىزدا پرەزيدەنتتىكتەن كەتكەن. بىراق قاۋىپسىزدىك كەڭەسى مەن "نۇر وتان" پارتياسىنىڭ باسشىسى رەتىندە ەلدەگى بيلىكتىڭ ءبىر بولىگىن ۇستاپ وتىر. ونىڭ "ۇلت كوشباسشىسى" ستاتۋسى بار. بۇل مارتەبەگە ساي، نازارباەۆ جانە ونىڭ وتباسى قىلمىستىق جاۋاپكەرشىلىككە تارتىلمايدى.

ايسۇلتان نازارباەۆ – داريعا نازارباەۆانىڭ ەكىنشى ۇلى. نازارباەۆا مەن اليەۆتىڭ تاعى ءنۇرالى اليەۆ (2014-16 جىلدارى قازاقستان استاناسى اكىمىنىڭ ورىنباسارى بولعان) جانە ۆەنەرا نازارباەۆا ەسىمدى بالالارى بار.

ايسۇلتان ۇلىبريتانيادا كورولدىك اسكەري اكادەميادا وقىپ، قازاقستانعا ورالعان. كەيىن ول قازاقستان قورعانىس مينيسترلىگى بارلاۋ باسقارماسىنا جۇمىسقا تۇرعان. 2017 جىلى جەتى ايداي قازاقستان فۋتبول فەدەراتسياسىنىڭ ۆيتسە-پرەزيدەنتى بولدى. كەيىن ول جەلىدەگى پاراقشاسىندا ەسىرتكى شەككەنىن، ودان ەمدەلگەنىن جازدى دا ءبىراز ۋاقىت جۇرت كوزىنەن تاسادا بولدى.

بىلتىر قازاندا لوندون سوتى ايسۇلتاندى شارتتى جازاعا كەسىپ، "18 اي سىناقتا بولىپ، 140 ساعات قوعامدىق جۇمىسقا جەگىلەدى جانە ءماجبۇرلى تۇردە ەسىرتكىگە تاۋەلدىلىكتەن ەمدەلەدى، ءبىر مىڭ فۋنت ايىپپۇل (1300 دوللار) مەن بەس مىڭ فۋنت (شامامەن 6500 دوللار) شىعىندى تولەۋى ءتيىس" دەپ شەشىم شىعارعان.

سوت ايسۇلتان نازارباەۆتى بريتان پوليتسياسىنا قارسىلىق كورسەتكەنى ءۇشىن جاۋاپقا تارتقان. ءىس ماتەريالدارىنا ساي، Covent Garden ايماعىنداعى پاتەردىڭ بالكونىنا شىعىپ العان بەلگىسىز ەر ادامدى كورگەن تۇرعىنداردىڭ ءبىرى پوليتسيا شاقىرعان. پوليتسيا كەلگەندە ەر ادام "ەسىرتكى اسەرىمەن پوليتسياعا قارسىلىق كورسەتكەن، قول جۇمساپ، تىستەگەن". كەيىن بالكونعا شىعىپ العان ەر ادامنىڭ ايسۇلتان ەكەنى انىقتالعان. ءۇيدىڭ يەسى ايسۇلتانمەن تانىس ەمەسىن، ونىڭ پاتەرگە قالاي كىرگەنىن بىلمەيتىنىن ايتقان. پوليتسيا ايسۇلتاندى ۇستاۋ ءۇشىن ەلەكتروشوكەر قولدانۋعا ءماجبۇر بولعان. ۆۆس سايتى ايسۇلتان ەلەكتروشوكەردى سىندىرىپ تاستاعانىن، پوليتسيانىڭ قولىن جاراقاتتاعانىن جازدى.

ءتورت ايدان كەيىن لوندون سوتى ايسۇلتان نازارباەۆقا ۇكىم شىعاردى. سوت ايسۇلتان بوستاندىقتا ءجۇرىپ، ەمدەلۋىنە بولادى دەگەن شەشىمگە كەلگەن.

بۇل سوتقا قاتىستى نازارباەۆ اۋلەتى ەشقانداي پىكىر بىلدىرگەن جوق.

"ازاتتىق" راديوسى

پىكىرلەر