مارعۇلان سەيسەمباي: حالىق كوشەگە شىعىپ، دۇكەندەردى تونايدى

1335

بەلگىلى كاسىپكەر مارعۇلان سەيسەمباي ەلىمىزدەگى كارانتين مەن توتەنشە جاعدايدى بيلىكتىڭ قابىلداعان وڭ شەشىمى ەكەنىن ايتتى. سونىمەن قاتار، جۇمىسسىز وتىرعان حالىق تۇرمىسقا قاجەتتى زاتتار الۋ ءۇشىن قاراجات تاپپاي، ۇرلىق جاساۋى مۇمكىن دەگەن قاۋىپىن دە جاسىرمادى. بۇل تۋرالى ول ءوزىنىڭ «مارعۇلان نە دەيدى» You Tube كانالىندا ايتتى، دەپ حابارلايدى «ادىرنا» ۇلتتىق پورتالىنىڭ ءتىلشىسى.

مارعۇلان سەيسەمباي ەلىمىزدەگى قالىپتاسقان جاعداي ءومىرىمىزدى كۇرت وزگەرتىپ، وزىمىزگە ۇيرەنشىكتى ىستەرىمىزبەن اينالىسا الماي قالدىق دەيدى.

«توتەنشە جاعدايدىڭ جانە كارانتيننىڭ ەڭ ءبىرىنشى، تۇپكى سەبەبى – دەنساۋلىق ساقتاۋ سالاسىنىڭ پارمەنسىز بولۋىندا جاتىر. ەگەر كوروناۆيرۋس ىندەتى تەز تارالىپ، كوپ ادامعا جۇقسا، وندا ءبىزدىڭ مەديتسينامىز بارلىق اۋىرىپ قالعان ادامداردى ەمدەي المايدى. ەمحانالارىمىز تەز تولىپ، دارىگەرلەر مەن وكپەگە وتتەگى بەرۋ قۇرالدارىنىڭ تاپشىلىعىنا كەلىپ تىرەلەمىز» - دەيدى، ءوزىنىڭ ەلدەگى جاعدايلارعا ءۇن قوسىپ كەلە جاتقان ادەتىمەن.

ەگەر كاسىپكەر ايتىپ كەتكەندەي جاعداي بولاتىن بولسا، ەلىمىزدە  سۇمدىق جاعدايلار بولۋى مۇمكىن. «دارىگەرلەر ەمدەلىپ شىعۋعا مۇمكىندىگى از ادامداردى ەمدەمەي قويادى جانە ولار قاي ادامنىڭ ءولىپ، قاي ادامنىڭ ەمدەلەتىنىن وزدەرى شەشەدى. كارى ادامدار ەشبىر ەم الا الماي ەمحانا دالىزدەرىندە ءولىپ جاتادى»،  - دەيدى. قازىر يتاليادا وسىنداي جاعداي بولىپ جاتقان كورىنەدى. وسى تۇستا ول بيلىكتىڭ قازىرگى ارەكەتىن دۇرىس دەپ باعالالاپ وتىر. ايتۋىنشا، بيلىكتىڭ توتەنشە جاعداي مەن كارانتين ەنگىزۋى، حالىقتى بارىنشا وقشاۋلاۋى ورىندى. ءدال قازىرگى جاعدايدا بيلىك حالىقتىڭ دەنساۋلىعىن ءبىرىنشى ورىنعا قويۋ قاجەت دەيدى.

بۇل ماسەلەنىڭ ەڭ جەڭىل جاعى بولسا، كەيىنىرەك ودان دا وزەكتى ماسەلە پايدا بولادى دەيدى. «بىرىنشىدەن، ءبىزدىڭ ەكونوميكامىزدا توتەنشە جاعداي مەن كارانتين سەبەپتەرىنەن بولاتىن كۇيزەلىس پەن داعدارىس بولادى. ول ەكى ماسەلەدەن تۋادى. بىرىنشىدەن، كارانتين ءبىر اي بولا ما، الدە ەكى اي بولادى ما؟ ونى ەشكىم بىلمەيدى. قانشا ۋاقىت بولعانىمەن، ەكى قالادا قامالىپ وتىرعان ميلليونداعان حالىق، ونىڭ ىشىندە، تابىسسىز وتىرعان ەر ادامدار نە ىستەيدى؟ كەرەكتى زاتتاردى الۋ ءۇشىن قاراجاتتى قايدان الادى؟ ەگەر ۇكىمەت وسى سۇراقتارعا ناقتى جاۋاپ بەرە الماسا، وندا حالىق يزولياتسيا مەن توتەنشە جاعدايعا قاراماي، كوشەگە شىعىپ، ۇرلىق پەن توناۋعا كوشەدى. ال پوليتسيا مەن قارۋلى كۇشتەر مۇنداي جاعدايدى توقتاتا المايدى»، - دەدى.

سونىمەن قاتار ول شەت ەلدەر تابىسسىز قالىپ وتىرعان حالقىنا كومەك كورسەتىپ وتىرعانىن مىسالعا كەلتىرىپ، حالقىمىزدى جۇمىسسىز، تابىسسىز قالدىرۋعا بولمايتىنىن ايتتى.

دايىنداعان: جاسۇلان ءناۋرىزالى

«ادىرنا» ۇلتتىق پورتالى

پىكىرلەر