الاش قوزباعاروۆ

799

الاش قوزباعاروۆ (1917 جىلى 23 قاراشادا سەمەي وڭىرى - 6 قاڭتار 1996 جىل، الماتى) - قازاقستان رەسپۋبليكاسىنىڭ ەڭبەك سىڭىرگەن دارىگەرى، مەديتسينا عىلىمدارىنىڭ كانديداتى.

الاش احمەتجاننىڭ ۇلكەن ۇلى، الماتى قالالىق №10 مەكتەپتىڭ 7 سىنىبى مەن تالدىقورعان مەديتسينالىق رابفاكتى اياقتاعان سوڭ، 1934 جىلى قازاق مەملەكەتتىك مەديتسينالىق ينستيتۋتىنا تۇسەدى. 1939 جىلى الاش قازمي-دى ءتامامداپ، دارىگەر–ەمدەۋشى ديپلومىن الىپ، اقمولا وبلىستىق دەنساۋلىق ساقتاۋ بولىمىنە جولداما الادى.

ءوزىنىڭ ەڭبەك جولىن شورتاندى اۋدانىندا كازتسيك اتىنداعى استىق سوۆحوزىنداعى ۋچاسكەلىك اۋرۋحانادا مەڭگەرۋشى بولۋدان باستايدى، كەيىن اۋدان اۋرۋحاناسىنىڭ حيرۋرگيا ءبولىمىنىڭ مەڭگەرۋشىسى بولىپ قىزمەت اتقارادى.

ءتورت جىلدىق ەڭبەك جولىنا سوعىس كەدەرگى بولادى. گەنەرال رىبالكونىن باسشىلىعىمەن 22-گۆارديالىق اتقىشتار بريگاداسى 3-باتالونىنىڭ دارىگەرى بولادى. ءوزىنىڭ باتىلدىعى مەن ەرلىگى ءۇشىن العاش رەت "قىزىل جۇلدىز" وردەنىمەن ماراپاتتالادى. دنەپردى، ۋكراينانىڭ وڭ جاعالاۋىن ازات ەتۋدە جاراقاتتار الادى. مايدان گوسپيتالىندە ەمدەلگەن سوڭ، قايتادان جارالىلاردى قۇتقارۋعا اتتانادى. كەيىن حيرۋرگيا ءبولىمىنىڭ باستىعى، تۋبەركۋلەز ءبولىمىنىڭ باستىعى قىزمەتتەرىن اتقارادى. جاۋىنگەرلەردى قۇتقارۋداعى ەڭبەگى ءۇشىن ەكىنشى مارتە "قىزىل جۇلدىز" وردەنىمەن جانە «گەرمانياداعى جەڭىسى ءۇشىن» مەدالىمەن ماراپاتتالادى.

سوعىس اياقتالعان سوڭ 1946 ج. ناۋرىز ايىندا ا.ا.قوزباعاروۆ قاتتى اۋىرادى. 4 ايعا جۋىق تالدىقورعان قالالىق اۋرۋحاناسىندا جانە جارتى جىلدان استام ۋاقىت سەمەي وتان سوعىسى مۇگەدەكتەرى گوسپيتالىندە ەمدەلەدى. 1948 جىلى اقپان ايىندا گوسپيتالدان شىققان سوڭ، اكۋشەر-گينەكولوگ بولىپ جۇمىس ىستەيدى. كەيىن سەمەي قالاسى زاتون اۋدانىنىڭ ەمدەۋ بىرلەستىگىنىڭ باس دارىگەرى، 1950-1958 جج. ارالىعىندا №1 پەرزەنتحانادا باس دارىگەر بولىپ قىزمەت اتقارادى. ول اكۋشەر، گينەكولوگيا سالاسىندا ەڭبەك ەتەدى. اكۋشەرلىك جانە گينەكولوگيالىق كافەدرا قۇرۋ كەزىندە ا.ا.قوزباعاروۆتان وتكەن كانديدات جوق ەدى.

«كلينيچەسكايا وتسەنكا نەكوتورىح مەتودوۆ ستيمۋلياتسي ي ۆوزبۋجدەنيا رودوۆوي دەياتەلنوستي» اتتى كانديداتتىق ديسسەرتاتسيا قورعايدى. 1957 جىلى ديسسەرتاتسياسىن قورعاپ، مەديتسينا عىلىمدارىنىڭ كانديداتى عىلىمي دارەجەسىن الادى. بۇدان سوڭ اكۋشەرلىك جانە گينەكولوگيالىق كافەدرانىڭ مەڭگەرۋشىسى قىزمەتىندە دوتسەنت اتاعىن الىپ 20 جىل ەڭبەك ەتەدى.

1979 جىلى رەسمي تۇردە دەمالىسقا شىققان سوڭ الاش احمەتجانۇلى ەت-كونسەرۆى كومبيناتىنىڭ مەديتسينا سانيتارلىق ءبولىمىنىڭ گينەكولوگيا سالاسىن باسقارادى. ول – 70 عىلىمي جۇمىس پەن كوپتەگەن ماقالالاردىڭ اۆتورى. 1996 جىلى 6 قاڭتاردا دۇنيەدەن وتەدى.

سەمەي قالاسىنىڭ اكىمى مەن قالالىق ءماسليحات قالا تۇرعىندارىنىڭ ۇسىنىسى بويىنشا قالانىڭ ورتالىق كوشەلەرىنىڭ بىرىنە الاش قوزباعاروۆ ەسىمىن بەرۋ تۋرالى شەشىم قابىلدادى.

قازاقستان رەسپۋبليكاسىنىڭ ەڭبەك سىڭىرگەن دارىگەرى، سەمەي وبلىستىق اكۋشەرلەر جانە گينەكەولوگتار عىلىمي قوعامىنىڭ نەگىزىن قالاۋشى الاش احمەتجانۇلى قوزباعاروۆتىڭ 90 جىلدىعىنا وراي شقو قازىرگى زامان تاريحى قۇجاتتاماسى ورتالىعى مۇراعاتشىلارىنىڭ ازىرلەۋىمەن 2007 جىلى «داريۋ تەبە جيزن…» (ساعان ءومىر سىيلايمىن) اتتى كىتاپشاسى جارىق كوردى. كىتاپشانى دايىنداۋ بارىسىندا شقو قزقو ا.قوزباعاروۆتىڭ جەكە قورىندا 896 قور، 72 ءىس، 1936-1997 جىلدار ارالىعىنداعى ماتەريالدار مەن فوتولارى ساقتاۋلى. قاراشانىڭ سوڭىندا سەمەي قالاسىنىڭ دەنساۋلىق ساقتاۋ دەپارتامەنتىمەن بىرلەسىپ ا.قوزباعاروۆتىڭ 90 جىلدىعىنا ارنالعان عىلىمي-پراكتيكالىق كونفەرەنتسيا وتكىزىلدى. وندا بالا مەن ايەلدەر ءومىرىن ساقتاۋدا ايانباي جان-تانىمەن ەڭبەك ەتكەن ازاماتتىڭ جانقيايرلىق ەڭبەگى، ونىڭ ءومىر سۇرگەن ورتاسى، اينالاسىمەن قارىم-قاتىناسى تۋرالى ءسوز بولدى. 

پىكىرلەر
رەداكتسيا تاڭداۋى