جاڭا مەملەكەتتىك جاردەماقى: 15775 وتباسىنىڭ ءۇمىتى

369

كەلەر جىلدىڭ 1 قاڭتارىنان باستاپ «ءتورت جانە ودان دا كوپ بىرگە تۇراتىن، كامەلەتكە تولماعان بالالارى بار، ونىڭ ىشىندە 23 جاسقا تولعانعا دەيىن ءبىلىم بەرۋ ۇيىمدارىندا كۇندىزگى وقۋ نىسانىندا وقيتىن بالالارى بار وتباسىلارعا» جاڭا مەملەكەتتىك جاردەماقى تولەۋ كوزدەلۋدە. «ازاماتتارعا ارنالعان ۇكىمەت» مەملەكەتتىك كورپوراتسياسى» كوممەرتسيالىق ەمەس اكتسيونەرلىك قوعامى اقتوبە وبلىسى بويىنشا فيليالى ديرەكتورىنىڭ ورىنباسارى ءىزباسار ورىنباساروۆتان الەۋمەتتىك توپتاعى وتباسىلارعا مەملەكەتتەن تاعايىندالاتىن جاردەماقىعا قاتىستى سۇراپ بىلگەن ەدىك.                                     

ونىڭ ايتۋىنشا، جاردەماقى مولشەرى وتباسىنداعى ءار بالانىڭ سانىنا قاتىستى ەسەپتەلمەك. سونىمەن قاتار  بۇل جاردەماقىنى الۋ ءۇشىن وتباسىنىڭ كىرىس تابىستارى ەسەپكە الىنبايتىن بولادى. ماسەلەن، ءتورت بالاسى بار وتباسىلار — 42 496 تەڭگە، بەس بالاسى بار وتباسىلار — 53127 تەڭگە، التى بالاسى بار وتباسىلار  — 63 757 تەڭگە، جەتى جانە ودان دا كوپ بالاسى بار وتباسىلار 74 388 تەڭگە الاتىن بولادى.

— قازىرگى تاڭدا اقتوبە وبلىسى بويىنشا بۇل جاردەماقىعا 15 775-تەن استام كوپبالالى وتباسى ۇمىتكەر. ونىڭ ىشىندە 9163-ى — «ءتورت جانە ودان كوپ بىرگە تۇراتىن كامەلەتكە تولماعان جانە كۇندىزگى وقۋ نىسانىندا وقيتىن 23 جاسقا دەيىنگى بالالارى بار كوپبالالى وتباسى» رەتىندە ارناۋلى مەملەكەتتىك جاردەماقى الۋشىلار. بۇل — 2018 جىلعا دەيىن تاعايىندالعان ارناۋلى مەملەكەتتىك جاردەماقى. ونىڭ مولشەرى — 10 504 تەڭگە.  وسى ساناتتاعى تولەم الۋشىلار جاڭا مەملەكەتتىك جاردەماقىعا اۆتوماتتى تۇردە اۋىستىرىلدى، ياعني اي سايىن الاتىن 10 504 تەڭگەنىڭ ورنىنا ەندى 42 500 تەڭگە مولشەرىندە جاردەماقى الاتىن بولادى. سونداي-اق وسى ساناتتاعى تولەم الۋشىلاردىڭ حالىققا قىزمەت كورسەتۋ ورتالىقتارىنا بارۋىنىڭ قاجەتتىلىگى جوق، سەبەبى تولەمدەردى اۋىستىرۋدىڭ بارلىق جۇمىستارى ەلەكتروندىق فورماتتا جۇزەگە اسىرىلدى. بۇل — ازاماتتارعا قولايلى بولۋ ءۇشىن الدىن الا جاسالعان شارا, — دەدى ءى.ورىنباساروۆ.

بۇل رەتتە «التىن القا»، «كۇمىس القا» القالارىمەن ماراپاتتالعان كوپبالالى انالارعا تولەنەتىن 16160 تەڭگە مولشەرىندەگى مەملەكەتتىك جاردەماقى ساقتالادى.

— ەگەر كوپبالالى وتباسى رەتىندە 2018 جىلعا دەيىن تاعايىندالعان ارناۋلى مەملەكەتتىك جاردەماقىنى الۋشىلاردىڭ وتباسىندا 2018-2019 جىلدار كەزەڭىندە بەسىنشى، التىنشى، جەتىنشى بالا تۋعان بولسا، مۇنداي تولەم الۋشىلار ءۇشىن تولەم بازاسىندا بالالار سانى ارتتىرىلدى جانە جاڭا مەملەكەتتىك جاردەماقىعا اۆتوماتتى تۇردە اۋىستىرىلدى. سوعان بايلانىستى مۇنداي تولەمدى الۋشىلار دا سارالانعان تۇردە بالالارىنىڭ سانىنا تيەسىلى جاڭا جاردەماقىنى حالىققا قىزمەت كورسەتۋ ورتالىقتارىنا بارماي-اق الاتىن بولادى. سەبەبى بارلىق قايتا ەسەپتەۋلەر ەلەكتروندى فورماتتا جۇرگىزىلدى. وبلىس بويىنشا مۇنداي تولەمدى الۋشىلار سانى — 1480 ادام، — دەدى ول.

ءىزباسار ورىنباساروۆ ءوز سوزىندە كەلەر جىلدان باستاپ تولەنەتىن جاڭا مەملەكەتتىك جاردەماقىنى الۋعا قۇقىلى الەۋەتتى الۋشىلار دا بار كورىنەدى. ولار —  كوپبالالى وتباسى رەتىندە ارناۋلى مەملەكەتتىك جاردەماقى المايتىندار. وبلىس بويىنشا وسىنداي الەۋەتتى الۋشىلار رەتىندە 5112-دەن استام وتباسى بار. بۇل ادامدار تۇرعىلىقتى جەرى بويىنشا حالىققا قىزمەت كورسەتۋ ورتالىقتارىنا بارىپ جانە كوپبالالى وتباسى رەتىندە جاڭا مەملەكەتتىك جاردەماقى تاعايىنداۋعا قاجەتتى قۇجاتتاردى ۇسىنىپ، ءوتىنىش بەرۋى ءتيىس.

«قۇجاتتاردى قابىلداۋ ەشقانداي مەرزىممەن شەكتەلمەگەن. مەسسەندجەرلەردە تارالعان، قۇجاتتاردى قىسقا مەرزىمدە تاپسىرۋ قاجەت ەكەندىگى تۋرالى اقپارات شىندىققا سايكەس كەلمەيدى، — دەدى كورپوراتسيا وكىلى.

ارايلىم نۇرباەۆا،

"اقتوبە" گازەتى

پىكىرلەر
رەداكتسيا تاڭداۋى