Covid-19: مەن الەمگە ءتارتىپ ورناتۋ ءۇشىن كەلدىم

3499
Adyrna.kz Telegram

بۇگىن الگى اتىشۋلى كورونوۆيرۋستى كوردىم. ويلاماعان جەردەن اۆتوبۋستا كەزدەسىپ قالدىم. باسىنداعى "كوروناسىنان" بىردەن تانىدىم. "الەم اۋرۋى" بايقاۋىنان باس جۇلدە الدىم دەپ پاڭدانىپ تۇرعان ەشتەڭەسى جوق. اينالاسىنا جايمەن عانا باياۋ كوز تاستاپ، قىلىمسىپ قاراپ قويادى.
ء"اا بالەم...ماسكا كيمەگەن بىرەۋدى اڭدىپ تۇرسىڭ-اۋ شاماسى",-دەپ ويلادىم.
اقىرى شىدامىم جەتپەدى، قايتەر ەكەن دەپ ماسكامدى شەشىپ الدىم دا، قالتاما ادەمىلەپ بۇكتەپ سالىپ قويدىم.
سول-اق ەكەن، جولاۋشىلاردىڭ اراسىنان ەش قيىندىقسىز ءوتىپ، مەنىڭ ءدال جانىما ءوزى-اق جەتىپ كەلدى. اۆتوبۋستا ادام سونشاما كوپ بولماسا دا، جورتا قىسىلعان سىڭاي تانىتىپ، ارقاما وتىرىك سۇيكەنىپ قويادى. جالما-جان بەتپەردەمدى قايتادان كيىپ الا قويدىم.
-سالەم، اۋرۋ قىز؟ الگى "الەم اۋرۋى" دەگەن سەنسىڭ عوي، ءا؟-دەدىم ءبىرىنشى بولىپ ءسوز باستاپ.
-يا مەن. بىردەن تانىپ قويعانىڭىزعا قاراعاندا مەن تۋرالى كوپ ەستىگەنسىز-اۋ ءسىرا،-دەدى ول دا ۇرلىعى اشىلىپ قالعان ادامداي وتىرىك قىلىمسي قاراپ.
-ءوي، سەن تۋرالى بۇكىل الەم ايتىپ جاتىر عوي. قالاي تانىمايمىز؟ الەمدەگى ەڭ اتاقتى اۋرۋ ءوزىڭسىڭ عوي -دەپ كوتەنىنە كوپشىك قويا سويلەدىم،- ءبىر جەرگە بارىپ، كەڭىنەن اڭگىمەلەسۋگە قالاي قارايسىڭ؟
-جاقسى...
اينالامىزداعى ادامداردىڭ ءبىزدىڭ اڭگىمەمىزبەن شارۋاسى جوق. اراسىندا "الەم اۋرۋى" بار ەكەنىنەن دە بەيحابار، جايباراقات. ءبىرى سوتكاسىن شۇقىلاپ، ەندى ءبىرى ناۋشنيكپەن مۋزىكا تىڭداپ وزىمەن-ءوزى بولىپ وتىر.
ەكەۋمىز كەلەسى ايالدامادان ءتۇسىپ قالدىق. شاي ءىشىپ وتىرىپ اڭگىمەلەسەيىك دەگەن ويىمىز ىسكە اسپادى. ويتكەنى الگىنىڭ انتيسەپتيكتەن اللەگياسى بار ەكەن. دەزينفەكتسيانىڭ ءيىسى شىقسا لوقسىپ تۇرا قاشادى ەكەن. كافە-رەستورانداردىڭ كوبى جابىق، ال اشىق تۇرعاندارىنا بۇرقىراتىپ تۇرىپ دەزينفەكتسيا جاساپ تاستاپتى. اقىرى ەكەۋمىزگە ءبىر ءۇيدىڭ بۇرىشىندا وتىرىپ اڭگىمەلەسۋگە تۋرا كەلدى.
-الەمدى وسىلايشا ابىگەرگە سالىپ، ساعان سونشاما نە بولدى؟ قانشاما ادام اجال قۇشتى، قانشاماسى اۋرۋ بولدى، ادامدار جۇمىسىنان ايىرىلىپ ناپاقاسىز قالدى، بالالار بىلىمنەن قاعىلدى؟ نە ويلاعان ويىڭ بار، قاشان قۇريسىڭ -دەپ ءتۇرىمدى بۇزا سويلەپ، سۇراقتى توتەسىنەن قويدىم.
-ەەە ادامدار، سەندەر نەگە ءبارىن مەنەن كورەسىڭدەر-دەدى ول اۋىر كۇرسىنىپ. مەن الەمگە ءتارتىپ ورناتۋ ءۇشىن كەلدىم. جەلمەن ۇشىپ جەرگە جابىسىپ جاتقاندا بەس كۇندە ارەڭ ولەتىن مەنى قۇرتۋ ازىرگە وڭاي بولماس. سەندەر قىزىلدى-جاسىلدى دۇنيەگە قۇمارتىپ، ماڭايلارىڭا كوز سالمايتىن دارەجەگە جەتتىڭدەر. كورشىڭ مەن جاقىندارىڭ دۇكەنگە نانعا بارۋعا اقشا تاپپاي وتىرعاندا، سەن ارتىق اقشاڭدى قالتاڭا باسىپ الەمدى شارلاپ ءجۇردىڭ. ايەلدەرىڭ دەمالىس كۇنىن وتباسىعا ارناۋدىڭ ورنىنا ساۋدا ۇيلەرى مەن سۇلۋلىق سالوندارىن ارالاپ كۇن وتكىزدى. ءتىپتى ۇيىڭدە تەلەديداردان كورۋگە بولاتىن ءفيلمدى دە اقشا تولەپ كينوتەاتردان تاماشالاۋشى ەدىڭدەر عوي. گيگيەنانى مۇلدە ەستەن شىعارىپ كوشەدە ەلدىڭ ءبارى ءبىر-بىرىمەن قۇشاقتاسىپ، ءسۇيىسىپ امانداسۋعا قۇشتار بولدىڭدار. ۋاقىتتىڭ دا، دەنساۋلىقتىڭ دا قادىرىن بىلمەدىڭدەر. جاستارىڭ تۇنگى كلۋبتان، ال جاسامىستارىڭ سىراحنالاردان شىقپايتىن بولدى. بالالارىڭا ۇيدە ساباعىن قاراۋدى قويىپ، بارلىعىن مۇعالىمدەرگە ىسىرىپ تاستادىڭدار. دارىگەرلەردى ديۆاندا جاتىپ-اپ جاماندادىڭدار. "ورازا ناماز توقتىقتا" دەگەن سوزگە شابىنىپ قارسى شىقتىڭدار. ءتىپتى ءوز ۇيلەرىڭدە اس-اۋقات دايىنداۋعا ەرىنىپ، اقشا شاشىپ قىمبات ءدامحانالاردان عانا تاماقتانىپ جۇردىڭدەر عوي. ۇنەمشىلدىك پەن قاناعات دەگەندى دە مۇلدە ۇمىتتىڭدار. قانداي قۇداي سۇيەر قىلىقتارىڭ بار؟ ايتشى ءوزىڭ،- دەپ باستىرمالاتا جونەلدى.
-يا، ايتقاندارىڭمەن تولىق كەلىسىمىن، بىراق سوندا دا ادام بولىپ ومىرگە ءبىر كەلگەن سوڭ ءبارىن كورگىڭ كەلەدى، توي-قىزىق كورمەسەڭ ءومىردىڭ ءمانى نە، بارىنەن حالىققا وبال بولدى عوي،-دەدىم ءسوز تابا الماي.
-ءا، بالەم توي-قىزىق، حالىق دەيسىڭ بە؟ كرەديت الىپ، بار تاپقانىڭدى تويعا شاشتىڭدار. اسابا بولىپ حالىقتىڭ 4-5 ساعاتتىق قۋانىشىنا وتىرىك اڭگىمە ايتىپ، ۇيالماي 400 مىڭ تەڭگە العاندا حالىقتىڭ جاعدايىن نەگە ويلامادىڭدار؟ بۇكىل تويحانالار، مەيراماحانالار بىرىنەن ءبىرى اسىرىپ باعا قويىپ، بۇكىل دجيپ ءمىنىپ حالىققا شەكەسىنەن شىرەنىپ قارايتىن ساۋداگەرلەر مەن بيزنەسمەندەر باعانى جارىسىپ تۇرىپ كوتەرگەندە وسىنىڭ بارلىعى قاراپايىم حالىقتىڭ ەڭبەگىمەن كەلىپ جاتقانىن نەگە ويلامادىڭدار؟ بانكتەر كرەديتكە وتسروچكا بەرىپتى دەپ ەستىدىم. سول بانكتەرىڭ بىرنەشە ەسە پايىزبەن كرەديت بەرەر كەزدە نەگە حالىقتى ويلامادى ەكەن؟ حالىق ءبىر اي عانا تابىسسىز قالىپ ەدى، ءبارىڭنىڭ دە ارتتارىڭ اشىلىپ قالدى. وتىرىك حالىقشىل بولا قالماڭدارشى،-دەدى.

بۇدان ارى ونىمەن داۋلاسىپ تۇرۋعا شىدامىم جەتپەدى. مارات وماروۆتىڭ "كورونوۆيرۋس، كەت، كەت كەت" دەگەن ءانىن ايقايلاپ ايتا جونەلدىم. سول ساتتە ءوز داۋىسىمنان ءوزىم شوشىپ وياندىم. ويانسام كۇنتىزبە 1-ءساۋىردى كورسەتىپ تۇر ەكەن.

كورونۆيرۋس كەت، كەت كەت!

ەرمەك قۇرمانعاليتەگى

پىكىرلەر