قۇدالار وتكىزەتىن پارلامەنت سايلاۋى ءادىل وتپەيدى

1262

"تاۋەلسىز باقىلاۋشىلار" قوعامدىق بىرلەستىگى پرەزيدەنت قاسىم-جومارت توقاەۆقا رەسمي حات جولدادى دەپ حابارلايدى «ادىرنا» ۇلتتىق پورتالى قوعامدىق بىرلەستىك وكىلى ارايلىم نازاروۆانىڭ حاتىنا سىلتەمە جاساپ. وتكەن سايلاۋدا تاۋەلسىز باقىلاۋشىنىڭ قىزمەتىن اتقارىپ، ءتۇرلى قيتۇرقىلىقتى ءوز كوزدەرىمەن كورىپ، كۋا بولعان ازاماتتار الداعى پارلامەنت سايلاۋىنىڭ ءادىل ءوتۋىن تالاپ ەتۋدە. ادىلدىكتىڭ العى شارتى رەتىندە بىرلەستىك وكىلدەرى ورتالىق سايلاۋ كوميسسياسى مەن بيلىك پارتياسى باسشىلارىنىڭ اراسىنداعى تۋىستىق قاتىناستى كولدەنەڭ تارتادى. وسك پەن بيلىك پارتياسىنىڭ باسشىلارى ءوزارا قۇدا ەكەنىن ايتقان تاۋەلسىز باقىلاۋشىلار مۇنداي تۋىستىق بايلانىس كەزىندە ءادىل سايلاۋ ءوتۋى مۇمكىن ەمەس دەيدى.

قۇرمەتتى، قاسىم-جومارت كەمەلۇلى!

ءبىز - بىلتىرعى وتكەن پرەزيدەنتتىك سايلاۋدا سايلاۋ ۋچاسكەلەرىندە بولعان كوپتەگەن زاڭبۇزۋشىلىقتار مەن سايلاۋ مادەنيەتىنىڭ تومەندىگىن، حالىق اراسىندا سايلاۋعا دەگەن سەنىمسىزدىكتىڭ قانداي دەڭگەيدە ەكەنىن كورگەن تاۋەلسىز باقىلاۋشىلارمىز. بىلتىرعى سايلاۋدان كەيىن رەسمي تۇردە «تاۋەلسىز باقىلاۋشىلار» قب رەتىندە بىرنەشە ايماقتاردا تىركەۋدەن وتتىك. ءبىزدىڭ باستى ماقساتىمىز – ءادىل سايلاۋدىڭ وتۋىنە اتسالىسۋ، ءاربىر قازاقستاندىققا ءوز  داۋىسىنىڭ ماڭىزدىلىعىن جەتكىزىپ، سايلاۋ مادەنيەتىن، سايلاۋعا دەگەن سەنىمدى قالىپتاستىرۋ. تەك ءادىل دە تازا سايلاۋ عانا بەيبىتشىلىكتىڭ كەپىلى بولادى دەپ بىلەمىز. ادىلەتسىز سايلاۋ قوعامدا قارسىلىق اكتسيالارىن تۋدىرىپ، ىشكى تولقۋلارعا الىپ كەلەدى. وعان دالەل رەتىندە الىسقا بارماي-اق كەشەگى بەلارۋس پەن كورشى قىرعىزستان ەلىندەگى سايلاۋلاردى اتاپ وتسەك بولادى. بۇعان دەيىن دە گرۋزيا، ارمەنيا، ۋكراينا ەلدەرىندەگى مايدانداردىڭ سەبەبى دە وسى ادىلەتسىز سايلاۋدىڭ ناتيجەسى ەمەس پە ەدى؟! ءبىز ەلىمىزدە بەيبىتشىلىكتىڭ بولعانىن، قازاقستاننىڭ كەز-كەلگەن ازاماتى ءوز تاڭداۋىنىڭ ماڭىزدى ەكەنىن تۇسىنە وتىرىپ، داۋىس بەرگەنىن، كەز-كەلگەن تاڭداۋ شىنايى حالىقتىق بولعانىن قالايمىز.

ا. لينكولن «سايلاۋ بيۋللەتەنى – وقتان دا كۇشتى» دەگەن ەكەن. ءيا، تەوريادا سولاي. ال، وكىنىشكە قاراي، بۇگىندە ءبىزدىڭ ەلدە سايلاۋ - سەنىمسىز الاڭ، بيۋللەتەن – قۇنسىز قاعازعا اينالدى. حالىق اراسىندا سايلاۋعا دەگەن سەنىمسىزدىكتىڭ بولۋىنىڭ سەبەپتەرى كوپ. بىلتىرعى سايلاۋدا ول سەبەپتەردىڭ نەدەن تۋىنداعانىن ءبىز ءوز كوزىمىزبەن كوردىك.

قۇرمەتتى، قاسىم-جومارت كەمەلۇلى، سىزدەن وسى پارلامەنت سايلاۋىنىڭ تازا، ءادىل ءوتۋىن قامتاماسىز ەتۋىڭىزدى، حالىققا سايلاۋعا دەگەن سەنىمدى قايتارۋىڭىزدى سۇرايمىز. ۋاقىت وتەدى، زامان كەتەدى، ال سايلاۋعا دەگەن سەنىم مەن سايلاۋ مادەنيەتى عاسىردان عاسىرعا ناعىز دەموكراتيانىڭ بەينەسى بولىپ قالۋى ءۇشىن تازا سايلاۋعا قادامدى بۇگىن جاساۋىمىز كەرەك.

الداعى پارلامەنت سايلاۋىنا حالىق اراسىندا وتە ۇلكەن سەنىمسىزدىك بار. وعان سەبەپتەردىڭ ءبىرى رەتىندە ورتالىق سايلاۋ كوميسسياسىنىڭ توراعاسى بەرىك يماشەۆ پەن بيلىك پارتياسى توراعاسىنىڭ تۋىستىعى. قازاق قۇداسىن قۇدايىنداي سىيلاعان ەلمىز. سايلاۋدى ۇيىمداستىرۋشى قۇرىلىمنىڭ باسشىسى باسەكەگە قاتىسۋشى پارتيا باسشىسىنىڭ وتباسىنا جاقىن تۇلعا بولۋى مورالدىق تۇرعىدا ب. يماشەۆ مىرزانىڭ وزىنە ديسكومفورت، سايلاۋعا قاتىسۋشى باسقا پارتيالاردىڭ جەڭىسكە دەگەن ۇمىتىنە كىربىڭ، حالىقتىڭ ءادىل سايلاۋعا دەگەن سەنىمىنە كۇمان تۋدىراتىنى انىق. وسىعان وراي، سىزدەن، وسك-ءنىڭ توراعاسى ب. يماشەۆتى قىزمەتىنەن بوساتۋىڭىزدى سۇرايمىز. بۇل، الداعى سايلاۋدىڭ تازا ءوتۋىنىڭ العىشارتى بولاتىن ەدى. بۇل تەك ءبىزدىڭ باقىلاۋشىلاردىڭ ءوتىنىشى ەمەس. 2020 جىلعى 31 قازاندا الماتى قالاسىندا وتكەن ميتينگتىڭ قارارىندا دا وسى تالاپ قويىلعان بولاتىن. كوپتەگەن ازاماتتىق بەلسەندىلەر ايتىپ، حالىقتىڭ كوكەيىندە جۇرگەن ماسەلە. ءسىز تىڭداۋشى مەملەكەتتى قالىپتاستىرۋشى ازامات رەتىندە حالىقتىڭ كوكەيىندە جۇرگەن بۇل ماسەلەنى بەي-جاي قالدىرماي، قۇلاق اساسىز دەپ ۇمىتتەنەمىز.

فوتو اشىق دەرەككوزدەن الىندى.

پىكىرلەر
رەداكتسيا تاڭداۋى