ازىق-تۇلىك باعاسى قىمباتتاسا كىمدەر جازالانادى؟

2691
Adyrna.kz Telegram

تۇركىستان وبلىسىندا وتكەن جيىندا «الەۋمەتتىك ماڭىزى بار ازىق-تۇلىك تاۋارلارىنىڭ باعاسىن تۇراقتاندىرۋ جانە نەگىزسىز وسىرمەۋ» ماسەلەسى قارالدى، دەپ حابارلايدى وبلىستىق اكىمدىكتىڭ ءباسپاسوز قىزمەتى.

الماتى، NEGE. وندا وبلىس اكىمدىگى مەن ءىرى تاۋار وندىرۋشىلەرمەن: «ياسسى قۇس»، «اسان-اتا»، «بەرەكە» جشس-مەن مەموراندۋمعا قول قويدى. وعان سايكەس تاۋار وندىرۋشىلەر وبلىستىڭ ىشكى نارىعىنداعى بىرقاتار الەۋمەتتىك ماڭىزى بار ازىق-تۇلىك تاۋارلارىنىڭ باعاسىن نەگىزسىز قىمباتتاتپاۋ جونىندەگى ۋاعدالاستىققا قول جەتكىزىلدى.

وبلىس اكىمىنىڭ ورىنباسارى مەيىرجان مىرزاليەۆتىڭ توراعالىعىمەن وتكەن ماجىلىسكە اۋىل شارۋاشىلىعى تاۋارىن وندىرۋشىلەر، ساۋدا ۇيلەرىنىڭ يەلەرى، ناۋبايحانا، بازارلاردىڭ باسشىلارى قاتىستى. جيىندا جىل باسىنان بەرى الەۋمەتتىك ماڭىزى بار ازىق-تۇلىك تاۋارلارىنا قويىلعان شەكتى باعالار بىرقاتار اۋدان، قالالاردا وسكەنى ايتىلدى.

اۋىل شارۋاشىلىعى باسقارماسىنىڭ باسشىلىعى جۇمىرتقا ءوندىرۋشى كاسىپورىننىڭ ءبىرى – كەنتاۋ قالاسىنا قاراستى «ياسسى قۇس» جشس-ءى جىل باسىندا س1 ساناتتى تاۋىق جۇمىرتقاسىن 1 داناسىن 44 تەڭگەدەن بوساتسا، بۇگىنگى تاڭدا باعاسى 38 تەڭگەگە تومەندەگەنىن مالىمدەدى. بۇدان بولەك، جۋىق ارادا قاجەتتى 350 توننادان استام كۇنباعىس مايى تۇراقتاندىرۋ قورىنا ساتىپ الۋ جۇمىستارى جۇرگىزىلىپ جاتقانى ايتىلدى. سونىمەن قاتار، اۋدان، قالا اكىمدىكتەرى مەن «تۇركىستان» الەۋمەتتىك-كاسىپكەرلىك كورپوراتسياسى اكتسيونەرلىك قوعامىنىڭ ۇيىمداستىرۋمەن مەرەكە جانە دەمالىس كۇندەرى حالىققا ءتيىمدى باعادا جارمەڭكە وتكىزىلۋدە.

بۇدان بولەك، تۇركىستان قالاسىنىڭ اۋماعىندا ورنالاسقان 13 الەۋمەتتىك دۇكەن مەن 5 ءىرى سۋپەرماركەتتە ۇن، قانت، كارتوپ، ءسابىز، پياز، كۇرىش، ماكارون، تۇز ارزانداتىلعان باعامەن ساتىلۋدا. 2021 جىلعا ەگىلەتىن اۋىل شارۋاشىلىعى داقىلدارىنىڭ بولجامدىق ەگىس قۇرىلىمىنا سايكەس، كەش پىسەتىن كارتوپ – 7,1 مىڭ گا، قىرىققابات – 2,9 مىڭ گا، پياز – 2,0 مىڭ گا جانە ءسابىز – 1,5 مىڭ گا ەگۋ جوسپارلانىپ وتىر. وندىرىلگەن ءونىم كولەمى وڭىرلىك تۇراقتاندىرۋ قورىن تولىقتىرۋ ءۇشىن ساتىپ الىنادى.

ال، وبلىستىق باسەكەلەستىكتى قورعاۋ جانە دامىتۋ دەپارتامەنتىنىڭ مالىمدەۋىنشە، الەۋمەتتىك ماڭىزى بار ازىق-تۇلىك تاۋارلار باعاسىن نەگىزسىز وسىرگەن بىرقاتار تاۋار وندىرۋشىلەرگە نۇسقامالار تاراتىلدى. نۇسقاما ورىندالماعان جاعدايدا، قولدانىستاعى زاڭ شەڭبەرىندە تەرگەپ-تەكسەرۋ جۇمىستارى باستالاتىنىن باياندادى.

وبلىس اكىمىنىڭ ورىنباسارى باعانى تۇراقتاندىرۋ ماقساتىندا «اينالمالى سحەما» اياسىندا نەسيەلەندىرۋ جۇمىستارىنىڭ تىم باياۋ جۇرگىزىلىپ جاتقانىن ايتتى.

سونىمەن قاتار، تاۋارلىق ينتەرۆەنتسيا جۇرگىزۋ، تۇراقتاندىرۋ قورىندا ازىق- تۇلىك تاۋارلارىنىڭ قورىن قالىپتاستىرۋ بويىنشا اتقارىلىپ جاتقان جۇمىستار جەتكىلىكسىز ەكەنىن ەسكەرتتى.

وسىعان وراي، «اينالمالى سحەما» اياسىندا ساۋدا ۇيلەرى مەن تاۋار وندىرۋشىلەرگە نەسيە بەرۋ ماسەلەسىن ودان ءارى پىسىقتاۋدى، اپتا سايىن تۇراقتى تۇردە اۋىل شارۋاشىلىعى ونىمدەرىنىڭ جارمەڭكەسىن ۇيىمداستىرۋدى، ازىق تۇلىك تاۋارلارىنىڭ باعاسىن نەگىزسىز كوتەرگەن ءوندىرۋشى كاسىپورىندار مەن جەتكىزىپ بەرۋشى كاسىپكەرلەر بويىنشا ناقتى جۇمىستار اتقارۋ تۋرالى ءتيىستى تاپسىرمالار بەردى.

پىكىرلەر