باتىس قازاقستاندا 800-دەن استام كيىك ءمۇيىزى تاركىلەندى

2080
Adyrna.kz Telegram

باتىس قازاقستان وبلىسىندا ءىرى كولەمدە كيىك ءمۇيىزىن ساتپاق بولعان براكونەرلەر ۇستالدى، دەپ حابارلادى Polisia.kz.

پوليتسيا قىزمەتكەرلەرى بوكەي ورداسى اۋدانىنىڭ تۇرعىندارىنان 800-دەن استام كيىك ءمۇيىزىن تاركىلەدى. ونىڭ قۇنى شامامەن 2 ميلليارد تەڭگەگە باعالانىپ وتىر. تەرگەۋ بارىسىندا ۇستالعان ادامداردىڭ وسىعان ۇقساس باسقا دا قىلمىستارعا قاتىسى بار ەكەنى انىقتالدى.

وقي وتىرىڭىز: قازاقستاننىڭ ەكى وبلىسىندا كيىكتەردى قىرىپ تاستاعاندار ۇستالدى

قازىرگى ۋاقىتتا ولاردىڭ سىبايلاستارى مەن مۇيىزدەردى وتكىزەتىن ورىندارى انىقتالۋدا. بۇل – سوڭعى جىلدارى براكونەرلەردەن تاركىلەنگەن كيىك ءمۇيىزىنىڭ ەڭ ءىرى پارتياسى.

"ارنايى وپەراتسيا ناتيجەسىندە بوكەي ورداسى اۋدانىنىڭ 1982 جانە 1994 جىلى تۋعان ءۇش تۇرعىنىن ۇستاپ، ولاردان سەگىز قاپشىققا سالىنعان 805 كيىك ءمۇيىزى تاركىلەندى. ۇستالعان ادامداردىڭ ايتۋىنشا، ولار 2020 جىلدىڭ كۇز مەزگىلىنەن بەرى وسى ۋاقىتقا دەيىن ولگەن كيىكتەردىڭ ءمۇيىزىن كەسىپ الىپ، ساقتاپ كەلگەن ەكەن. ولار قپك-ءنىڭ 128-بابىنا سايكەس ۋاقىتقا ۇستاۋ يزولياتورىنا قاماۋعا الىندى", - دەپ حابارلادى وبلىستىڭ پوليتسيا دەپارتامەنتى.

ولارعا قاتىستى قىلمىستىق كودەكستىڭ 339-بابى 1-بولىگى بويىنشا سوتقا دەيىنگى تەرگەۋ باستالدى. كۇدىكتىلەر 3 جىلدان 12 جىلعا دەيىن باس بوستاندىعىنان ايىرىلۋى مۇمكىن.

"بىرقاتار ساراپتاما تاعايىندالدى، ونىڭ ىشىندە بيولوگيالىق جانە تراسولوگيالىق ساراپتاما دا بار. ۇستالعان ادامداردىڭ قىلمىستىق ارەكەتىنەن كەلگەن شىعىن شامامەن 2 ميلليارد تەڭگە بولدى", - دەلىنگەن حابارلامادا.

قازىرگى ۋاقىتتا تاياۋ شەتەلدەردە كيىك ءمۇيىزىن كوتەرمە باعامەن ساتىپ الۋمەن اينالىساتىن ادامداردى انىقتاۋ ءۇشىن جەدەل-ىزدەستىرۋ ءىس-شارالارى جۇرگىزىلۋدە.​

ەسكە سالا كەتەيىك، 2021 جىلدىڭ اقپان ايىندا زاشاعان كەنتىندە 1987 جىلى تۋعان ازامات ۇستالىپ، ودان 219 كيىك ءمۇيىزى الىنعان بولاتىن.

پىكىرلەر