جوعالعان 40 مىڭ دوللاردى يەسىنە قايتارعان كەدەي ادام امەريكانى شۋلاتتى

6518
قوعام ىشىندەگى كوپتەگەن ادامدار ءۇيسىز جانداردى "الاياقتار", "ۇساق ۇرىلار" - دەپ ساناپ، بارلىعىنا بىرجاقتى قارايدى. بەكەر-اق! سەبەبى، ادامنىڭ ادالدىعى مەن ادەپتىلىگى ونىڭ "الەۋمەتتىك مارتەبەسىمەن" انىقتالمايدى. وعان - ءۇيسىز امەريكاندىق گلەن دجەيمس دالەل. ول كۇندەردىڭ ءبىر كۇنىندە دورچەستەردەگى South Bay Mall ساۋدا ورتالىعىنان 40 مىڭ اقش دوللارى بار ريۋكزاكتى تاۋىپ الادى. الايدا، كوپ ۇزاماي ول تابىلعان ولجانىڭ ءبىر تيىنىن دا جىمقىرماي پوليتسياعا تاپسىرعان كورىنەدى.
كوپتىڭ قولىڭان كەلە بەرمەيتىن ۇلى ءىستىڭ سەبەپكەرى اتانعان گلەن دجەيمس 1959 جىلى بوستوندا دۇنيەگە كەلگەن. كەزىندە گلەننىڭ ءۇيى دە، سوت القاسىندا بەدەلدى قىزمەتى دە بولعان.
بىراق، 2005 جىلى گلەننىڭ كوك تيىنسىز دالادا قالۋىنا قيىن جاعدايلار تۋىنداپ، وسىنداي كەلەڭسىزدىككە ۇشىراعان... ول كوبىنە ۇيسىزدەرگە ارنالعان باسپانادا تۇنەيدى ەكەن. دەنساۋلىعىنا بايلانىستى گلەن جاڭا جۇمىس تابا الماي، ءبىراز قينالعان. بىراق، «كوشە ءومىرى» 62 جاستاعى امەريكاندىقتى ءوزىنىڭ ادالدىعى مەن قادىر-قاسيەتىن توناي الماعاندىعىنا كوزىمىز جەتىپ وتىر...
تابىلعان ريۋكزاكتا تولقۇجاتتىڭ بولۋى يەسىنىڭ جەكە باسىن تەز انىقتاۋعا ىقپال ەتەدى. ريۋكزاكتىڭ يەسى بوستونداعى دوسىنا قوناققا كەلگەن قىتايدان كەلگەن ستۋدەنت بولىپ شىعادى. ول دجەيمسكە دە، پوليتسياعا دا رازى بولىپ، ءالى دە جاقسى ادامداردىڭ بار ەكەندىگىنە تاڭقالىپ، ءوز العىسىن بىلدىرەدى.
گلەن دجەيمستىڭ بۇل ارەكەتى امەريكا جۇرتشىلىعىن ءدۇر سىلكىندىردى. ونىڭ ادالدىعىنا قۋانعان ادامدار گلەنگە قانداي دا ءبىر جولمەن كومەكتەسكىلەرى كەلدى. وسىلايشا، ۆيردجينيادان كەلگەن يتان ۋيتتينگتون گلەن دجەيمسكە قاراجات جيناۋ اكتسياسىن ۇيىمداستىرادى.
اقشا جيناۋ عالامتوردا ىسكە قوسىلعان "GoFundMe" قايىرىمدىلىق جوباسى اياسىندا جۇزەگە اسىرىلدى. قايىرىمدىلىقتان جينالعان سوما تاڭقالارلىقتاي ۇلكەن قاراجاتتى قامتىدى جانە ەڭ قىزىعى، دجەيمستىڭ قىتايلىق ستۋدەنتتىڭ ريۋكزاگىنان تاپقانىنان دا اسىپ ءتۇستى.
العاشقى كۇنى 50 مىڭ دوللاردان استام قاراجات جينالدى، كەيىنىرەك قايىرىمدىلىق سانى 100 مىڭ دوللارعا جەتتى. سونىمەن قاتار، ادامدار گلەنگە تاماق، كيىم، باسپانا ۇسىندى. ال، ستوماتولوگتار قاۋىمداستىعى – وعان ءومىر بويى تەگىن ستوماتولوگيالىق كومەك كورسەتتى. اقشاعا تولى ريۋكزاكتى يەسىنە قايتارعان، گلەن دجەيمس "بايلىق سىناعىنان" ءساتتى ءوتتى دەپ ايتا الامىز، سول ءۇشىن ول لايىقتى ماراپاتتالدى.
سالتاناتتى تۇردە بوستون پوليتسياسىنىڭ كوميسسارى گلەنگە "تاڭعاجايىپ ادەپتىلىگى مەن ادالدىعى ءۇشىن" ديپلوم تابىس ەتتى. گلەننىڭ ءوزى مۇنداي نازار اۋدارۋعا ۇيرەنبەگەن جانە ونى كامەرا الدىندا، وتە ۇيالشاق دەيدى. ول ءوزىنىڭ ءىس-ارەكەتى تۋرالى "بايلىققا مۇلدەم مۇقتاج ەمەسپىن" - دەپ ءتۇسىندىردى، ويتكەنى، قۇداي ونى ءاردايىم قورعايدى، جانە ەگەر ول ەڭ شاراسىز جاعدايدا قالعاننىڭ وزىندە، ەشۋاقىتتا ەشكىمنىڭ نارسەسىن يەمدەنبەيتىنىن ايتتى. نەتكەن جومارتتىلىق... نەتكەن ادالدىق... 

زارينا اشىربەك،

"ادىرنا" ۇلتتىق پورتالى

پىكىرلەر
رەداكتسيا تاڭداۋى