Еуропалық комиссия АҚШ президенті Дональд Трамп әкімшілігіне Еуропалық одақ үшін маңызды саналатын тауарларды америкалық кедендік тарифтерден босату туралы ресми өтініш жібермек, деп хабарлайды "Адырна" ұлттық порталы.
ЕО дайындаған тауарлар тізімі 27 беттен тұрады. Брюссель Вашингтон енгізген жоғары тарифтерден қорғауды көздейтін негізгі өнімдер қатарына паста, ірімшік, шарап, күшті алкоголь түрлері, зәйтүн майы және күннен қорғайтын көзілдіріктер енгізілген.
Сондай-ақ тізімде алмаз, құрал-сайман, металл құбыр, кеме қозғалтқыштарының бөлшектері, өндірістік жабдықтар, мата, аяқ киім, бас киімдер, керамика және өнеркәсіптік роботтар бар.
Бұл құжат жұма күні ЕО елдерімен келісіліп, дүйсенбіде АҚШ-тың сауда министрі Говард Лютник пен АҚШ-тың сауда өкілі Джеймисон Грирге ұсынылады.
Аталған тауарлар Трамп пен Еурокомиссия төрайымы Урсула фон дер Ляйен биыл шілдеде Шотландиядағы Тернберри гольф-курортында жасаған сауда келісімі аясында қарастырылмаған. Сол келісім кейбір тауарларды, мәселен, ұшақтарды тарифтен босатқанымен, көптеген еуропалық өнімдерге 15 пайыздық тариф енгізді. Ал ЕО өз тарапынан АҚШ-тың өнеркәсіптік тауарларына салынған барлық тарифтерді алып тастауға міндеттеледі.
